Ngjarja e rëndë ka ndodhur në Itali dhe opinioni publik është tronditur.
Gjithë mediat merren me rastin dhe bëjnë thirrje për sensibilizimin e edukimit të brezit të ri.
Fillimisht, ishte një zënkë me gjyshen. Më pas, një agresion i dhunshëm ndaj gjyshit, i cili ndërhyri në mbrojtje të gruas së tij, shkruan today.it
Kjo është tabloja e një krimi absurd në Bucchianico të Italisë, ku një adoleshent 15-vjeçar, i dyshuar se vuan nga problematika të shëndetit mendor, vrau gjyshin e tij 78-vjeçar, pas plagëve të rënda të marra gjatë dhunës që ushtroi nipi i tij.
Çështja merr përmasa edhe më të mëdha, kur ky i fundit e postoi gjithë filmimin e agresionit në statusin e tij në Whatsapp.
Fillimisht e goditi në fytyrë me fshesë me korent. Më pas, me një karrige e më tej ende, radhën e patën shqelmat.
Për autoritetet, nuk kishte mbetur tjetër gjë veçse të mblidhnin provat e ta arrestonin të riun.
Adoleshenti, pas ngjarjes, ishte mbyllur menjëherë në dhomën e tij dhe doli vetëm kur forcat karabienere mbërritën në banesë.
Ai u akuzua menjëherë për vrasje. Por, diagnoza e tij e problematikave mendore, duket se nga burgu, mund ta dërgojë në një institucion për problematika të shëndetit mendor.
Ai prej kohësh ndiqej si rast edhe nga shërbimet sociale, veçse shpërthimi i fundit, qe i pakontrollueshëm dhe fatal për gjyshin e tij.
Një tragjedi e vërtetë, e cila të paktën shërben për t’i hapur sytë një shoqërie të tërë ndaj problematike të shëndetit mendor dhe trajtimit të tyre.
