Terapia e rërës është e lashtë sa vetë jeta njerëzore.
Dikur pa e ditur, njerëzit e vendeve bregdetare, kishin konstatuar se qëndrimi në rërën e ngrohtë i bënte ata të ndiheshin më mirë në aspektin fizik dhe ndiheshin të shplodhur për ecjet e gjata.
Më vonë, me rritjen e dijeve, njerëzimi mësoi se rëra ishte një minierë mineralesh.
E pra rëra përmban magnez, kalium, kalcium, sodium, jod, silikon.
Kujtojmë se magnezi është i domosdoshëm për kockat dhe qelizat e trupit të njeriut.
Është e provuar se rëra e detit lehtëson reumatizmat dhe artritet, pra ndikon në shëndetin e kockave.
Natyrisht, rëra në plazh gjendet kudo, me përjashtim të plazheve shkëmbore.
Fatmirësisht vendi jonë ka një vijë bregdetare të gjatë dhe në shumicë ranore.
Që nga Velipoja në veri dhe deri në Orikum në jug, plazhi është ranor.
Kujtojmë plazhet e mrekullueshme të gjithë vijës bregdetare të Velipojës me rërë të zezë, plazhet e Shëngjinit, Rana e Hedhun, Tale, Kune, Gjiri i Lalëzit, Hamallaj, Kallm, Durrësi, Golemi, Mali i Robit, Plazhi Gjeneralit, Spille, Boshtovë, Divjakë, Seman, Hoxharë, Pish Poro, Akërrni, Zvërneci, Vlora, Orikumi.
Kaq shumë rërë…
E në këto “fusha” mund të luani e të kuroheni.
Bëhuni mjekë të vetes, hiqini sandalet, shapkat, lëkura juaj të jetë në kontaktë me rërën e ngrohtë, jo përvëluese.
Lëkura do të lëmohet, qelizat dhe indet e vdekura të lëkurës, nga fërkimi do të mbesin në rërë. Poret e lëkurës do të hapen, mikroelementë do të përthithen nga lëkura juaj.
Zhytuni në rërë, mbulohuni me rërë për 20 -30 minuta, djersitni aty dhe para se të futeni në det për t’u shplarë, pritni që djersa të thahet në trup.
Këto “lojra”, mos i bëni në pikun e nxehtësisë sepse lëkura digjet.
Ecja në rërë ju ndihmon që të jeni i shëndetshëm dhe vital. A e keni vërejtur se ecja në rërën e plazhit është më e mundishme se sa ecja e zakonshme? Kjo përpjekje ndikon si një lloj ushtrimi, muskujt tërhiqen dhe tonifikohen shumë shpejtë.
Kura me rërë është falas, si e tillë, mundohuni që të shmangni sa më shumë shezlongët, me këtë rast edhe kurseni.
Bëni plazh si dikur, në kohët e vjetra, rërë dhe peshqir.
Mos harroni, mbulimi me rërë rregullon qarkullimin e gjakut, por nuk këshillohet për njerëzit me probleme tensioni dhe ata që kanë probleme specifike me lëkurën. Në këto raste, këshilla me mjekun është e domosdoshme.
