Varrezat katolike të Rrmajt në Shkodër janë shpallur “Monument Kulture”, por ato veç vdekjes dhe amëshimit mbartin dhe plumbat që diktatura komuniste zbrazi mbi klerin e këtij besimi.
EPJU ZOT PUSHIMIN E PASOSUN!
Varrezat e Rrmajt në Shkodër, Krenari Kombëtare!
“Nëse ka një dëshmi të artit Ndërtimor, të ngritur në nivel Qytetar, ai ndodhet padyshim në Monumentet Funerale të Varrezave të Rrmajit në Shkodër”.(Arkitekt A.Shkreli)
Në varret e vjetra që ndodhen në atë varrezë, por edhe në ato më të rejat, shihet qartë mjeshtëria e ndërtimit të tyre, që nuk ndryshon nga varrezat e vendeve të ndryshme të Europës Perëndimore.
Kjo tregon se qytetërimi postosman në traditën kulturore të qytetit të Shkodrës, ka qenë i fuqishëm e i pranishëm gjatë Rilindjes sonë Kombëtare.
Shkruhet edhe sot për gjurmët tona, nga koha e lashtë e deri te Rilindja jonë Kombëtare,..për varret e etërve dhe gjyshërve tanë, të cilët me vetëflijim ringjallën kombin, historinë, gjuhën dhe kulturën europiane,..për vendet e shenjtëruara nga kujtimi i burrave e grave që bënë Shqipërinë dhe ruajtën genin tonë nga tjetërsimi.
Këto figura, me shpirt gjënden pranë Hyjit, kurse me Trup e Hir Prehen në Varrezat e Rrmajt.
Në këto varreza prehen eshtrat e Klerikëve, krijues të Kulturës Shqiptare, të familjeve e personave të shquar që bënë emër në fusha të ndryshme në historinë e Shqipërisë.
Varrezat e Rrmajt, janë të njohura edhe për diçka tjetër,…për plumbat breshëri të lëshuar mbi dhjetëra Klerikë Katolik Intelektualë, të pa fajshëm të ekzekutuar gjatë diktaturës në vitin 1945-1948.
Ata u pushkatuan pa gjyqe, te muri i jashtëm i varrezave, buzë lumit Kir, për arsye se donin që Shqipëria të jetë Perëndimore.
Duke parë rëndësinë historike dhe arkitekturore që kanë këto varreza dhe për të ruajtjur vlerat urbanistike, Ministria e Kulturës me kërkesë të Zyrës Famullitare të Shkodrës, në vitin 2007, varrezat i shpalli Monument Kulture.
