188 policë nën hetim dhe 23 të arrestuar në 6 muaj
188 efektivë policie të sektorëve të ndryshëm janë vënë nën hetim dhe janë dërguar në prokurori nga Agjencia e Mbikëqyrjes Policore për gjashtë muaj, sipas Klan News.
Krahas tyre, AMP nisi hetimet edhe për tre punonjës të tjerë të Gardës së Republikës. Efektivët dhe gardistët dyshohen për shpërdorim detyrë e korrupsion, por edhe për vepra të tjera penale, si mosveprim, apo veprime arbitrare gjatë ushtrimit të punës.
Sipas të dhënave nga Janari në Qershor janë arrestuar me masa sigurimi të caktuara nga gjykata edhe për 23 punonjës policie dhe tre gardistë. Numrin më të lartë të të hetuarve dhe
arrestuarve, e ka patur muaji që lamë pas. Gjatë Qershorit, u dërguan për hetim 50 efektivë, ku 6 prej tyre u arrestuan me vendime gjykate.
Në muajin e shkuar, u caktua arrest shtëpie për dy ish-nën drejtorët e Policisë së Elbasanit, për deklarim të rremë e shpërdorim detyre, se nuk reaguan në kohë për të parandaluar vrasjen e Pjerin Xhuvanit, para zgjedhjeve të 25 Prillit. Raste të tjera ishin efektivët e arrestuar në Velipojë për favorizimin e kultivimit të kanabisit, apo dhe punonjës të pikave doganore për lejim të kalimit të mallrave kontrabandë. Sipas Agjencisë së Mbikëqyrjes Policore, gjatë kësaj kohe u trajtuan edhe 1174 ankesa, ku numri më i lart janë shkeljet që kryejnë efektivët e rendit dhe sigurisë publike, për të vijuar me policinë rrugore, specialistët e hetimit të krimeve, ndërsa të tjerat për sektorë të ndryshëm.
