Lideri historik i Partisë Demokratike dhe drejtuesi i saj, Sali Berisha, ka përcjellë një mesazh të rëndësishëm në përkujtim të 2 korrikut 1990, ditës, kur shqiptarët prekën realisht Evropën, nëpërmjet ambasadave në Tiranë.
Ja postimi i plotë:
Sot 32 vjetori i kryengritjes së 2 korrikut 1990!
Të dashur miq, në historinë e qëndresës së shqiptarëve kundër diktaturës staliniste më jetëgjatë në Europë dhe lirisë së tyre, është një ditë e shënuar. Më datën 2 Korrik të vitit 1990 mijra të rinj, punëtorë por edhe intelektualë e të persekutuar të Tiranës u ngritën dhe me një guxim epik shembën në Tiranë murin e Berlinit, hynë në oborrin e ambasadës gjermane dhe ambasadave të tjera dhe plagosën për vdekje diktaturën e fundit staliniste në Europe e përmbysën edhe në Shqiperi Murin e Berlinit.
Por mjerisht qytetarët e Tiranës dhe inteligjenca e saj u gjetën në bisht të kohës. Ata nuk guxuan të mbështesin kryengritjen epike të guximtarëve të kombit, nuk mbushën rrugët dhe sheshet e Tiranës për të përmbysur si në vendet e tjera ishkomuniste diktaturën hoxhiste në Shqipëri.
Me gjithë këtë e pavarësisht nga kjo, Kryengritja paqësore e 2 korrikut 1990 goditi rëndë dhe bëri të pashpresë diktaturën komuniste ne Tirane.
Ajo me jehonën e saj të jashtëzakonshme dëshmoi se Shqipëria socialiste nuk ishte dhe nuk do mbetej shkëmb graniti i socializmit në Europë, apo Kuba e Adriatikut dhe se diktatura komuniste në këtë vend kishte hyrë në agoninë e saj.
Ndaj dhe sot le të perulemi ne me mirënjohje të thellë dhe nderim të madh para të gjithë atyre djemve dhe vajzave të pamposhtur e guximtarë që përmbysën më 2 korrik të vitit 1990 murin e Berlinit në segmentin më të lartë, më të zi të tij, në Tiranë.
Mirënjohja jonë këtë ditë shkon edhe për ambasadorin e RFGJ Werner Daum dhe kolegët e tij për mbështetjen e tyre të fuqishme për kryengritësit e 2 korrikut dhe popullin e shtypur shqiptar.
Nderim i veçantë për martirin e kësaj kryengritje, te riun 15 vjeçar Artim Basha që ra për të mbetur i pavdekshëm në altarin e lirisë së shqiptarëve. sb
