Paranteza e një gazetari përpara Pyetjes së tij, drejtuar KM dhe zonjës Xhaçka, ishte goditje nën gju, por qëlloj që vetë Kryeministri u shtri përtokë dhe plumbi e mori në ballë.
Gazetari, i befasuar nga e papritura e madhe, e humbi toruan dhe nuk diti më se ç’të bënte me viktimën e tij, zaten as me veten.
Në njëfarë kuptimi ajo sallë u shndërrua në skenë, nuk po themi krimi, por shtangie për të gjithë, ku asnjëri nuk po dinte më se si të sillej me Kryeministrin, që automatikisht pas goditjes u shndërrua në Prokuror që në fjalinë e parë dhe fill Gjyqtar në të dytën.
Shpalli Deklarimin fajtor të gazetarit dhe dënimin e tij me tre muaj Dëbim për Edukim.
I numëroi ditët dhe i tha se mund të vini përsëri me 1 tetor. Dënimi mori formë të prerë automatikisht, si ato dënimet me Ekzekutim të menjëhershëm.
Gazetari i papërvojë në ziafetet e drejtësisë, mungoi në një batutë, që do të mbetej në histori, si psh:
Zoti kryetar i trupit gjykues, ju lutem mos ma hiqni të drejtën e fjalës së fundit, por…aq ishte.
Iku kjo.
Paranteza e gazetarit, më kujtoj një ngjarje, sigurisht e sajuar apo jo, nuk e di, e ndodhur gjatë diktaturës. Ja se si:
Në një qytet të rëndësishëm të vendit tonë, banonte një Marinar, të cilin tre javë pas martesës, e kishin nisur për në Kinë. Kthimi, sipas parashikimeve do të bëhej pas 6 muajsh. Kishte raste që shkonte edhe më shumë. Këtë sekret sigurisht që nuk ja kishte thënë nuses së tij. E shkreta nuse rrinte në ballkon gjithë ditën e Perendisë duke parë e soditur kalimtarë që kalonin tash e parë. Ndër ta, kishte pikasur një polic të pashëm dhe ishte përpjekur për të vënë njëfarë kontakti vizual me të. Pas shumë mundimesh, ja kishte arritur qëllimit dhe pas disa përshëndetjesh të kujdesshme me gjysmëlëvizjesh të duarve, një ditë e fton në shtëpi nga ballkoni, me demek se kishte diçka për ti thënë. Polici vjen deri tek dera e nuses së marinarit, troket dhe pret të zonjën ti çelë derën. Ajo hapi derën dhe e fton të hyjë brenda me të shpejtë. Polici nuk tundet dhe i thotë të zonjës (jo të Bujtinës) se e kemi të ndaluar rreptësisht të futemi në banesat e qytetarëve, të pashoqëruar me një anëtar të Këshillit të Lagjes.
Mori si përgjigje një “Idiot” dhe dera ju përplas në surrat.
Nuk jam i sigurtë nëse është akoma në fuqi ai rregulli për takimin e oligarkëve nga Ministat në prani të paktën një anëtari të Këshillit Bashkiak, pasi nuk mora vesh se ç’u bë më tej, pas dënimit të gazetarit!!!
