Këtë takim e ka njoftuar në rrjete sociale kreu i grupit parlamentar të PS-së, Taulant Balla.
Lajm i mirë vjen nga Brukseli, shkruan Balla, mbi mundësinë e mbajtjes së Konferencës së Parë Ndërqeveritare me Shqipërinë dhe Maqedoninë e Veriut.
Postimi i tij:
Kënaqësi të prisja në një takim Ambasadorin e Republikës Çeke në Shqipëri, z. Karel Urban. E falenderova Ambasadorin për rolin konstruktiv të Republikës Çeke në raport me rrugëtimin e Ballkanit Perëndimor dhe Shqipërisë në Bashkimin Europian 🇪🇺.
Diskutuam mbi pesë prioritetet e Presidencës Çeke të Këshillit të Bashkimit Europian e cila fillon zyrtarisht më 1 korrik, të cilat janë diktuar nga situate e re gjeopolitike e krijuar për shkak të agresionit të paprecedentë të Rusisë ndaj Ukrainës.
U dakordësuam mbi faktin që Ballkani Perëndimor duhet të mbetet prioritet i Bashkimit Europian për të mundësuar vazhdimësinë e reformave të thella dhe transformuese të nisura në kuadër të procesit të integrimit. Ndamë me Ambasadorin lajmin e mirë që vjen nga Brukseli mbi mundësinë e mbajtjes së Konferencës së Parë Ndërqeveritare me Shqipërinë dhe Maqedoninë e Veriut javën e ardhshme. Në vazhdën e rritjes së kredibilitetit të procesit të zgjerimit theksova domosdoshmërinë e liberalizimit të vizave me Kosovën sa më parë.
