Kryetari i Bashkisë së Tiranës, Erion Veliaj priti sot senatorin italian, ish kryetarin e Bashkisë së Pescara-s, Luciano D’Alfonso.
Kryebashkiaku Veliaj e falenderoi senatorin D’Alfonso për mbështetjen që i ka dhënë komunitetit shqiptar në Itali.
Në takimin me të Veliaj u shpreh:
“D’Alfonso është mik, vëlla, një italo-shqiptar – duke qenë se është edhe shtetas shqiptar – dhe një senator me reputacion të jashtëzakonshëm në Itali, ambasador ‘de fakto’ mes Shqipërisë dhe Italisë. Ju jam shumë mirënjohës që, një italo-shqiptar si ju, është edhe një avokat shumë i zellshëm i kauzave të përbashkëta. Si në çdo fushë, nëse dikush nuk të hap derën, nëse dikush nuk të jep një shtysë, nëse nuk të inkurajon të ecësh përpara, sigurisht suksesi bëhet më i vështirë. Por, diplomacia
mes njerëzve, një derë e hapur nga dikush me reputacion, i cili krijon mundësi për të tjerët, është një bekim i madh për ne. Mezi pres që t’i forcojmë urat e bashkëpunimit, jo vetëm mes qyteteve tona, me Chiet-in, me Pescara-n dhe shumë prej qyteteve të rëndësishme të Abruzzo-s, por mezi pres që ta forcojmë këtë bashkëpunim edhe me senatin Italian dhe shumë prej rrjeteve të atyre që shërbejnë në qeverinë qendrore dhe lokale. Ju falënderoj publikisht për gjithë ndihmën e jashtëzakonshme dhe të paçmueshme që i keni dhënë komunitetit shqiptar në Abruzzo dhe në të gjithë Italinë”
