Një grup shkrimtarësh dhe studiuesish, organizuar nga Klubi i Poezisë, të cilin e drejton Shahu dhe mbështetur nga deputeti Flamur Hoxha, dje kanë kryer një pelegrinazh nderimi për shkrimtaren disidente Musine Kokalari, që ka jetuar për 22 vite e vdekur, në qytetin e Rrëshenit.
Ja shkrimi i plotë i poetit Rexhep Shahu:
Mirënjohja është njeriu, mirënjohja jemi ne njerëzit e gjallë.
Në Rrëshen për Musine Kokalarin…
Një grup shkrimtarësh të organizuar nga Klubi i Poezisë, me mbështetjen e humansitit Flamur Hoxha, deputet, nderuan sot me 22 qershor 2022 në Rrëshen, shkrimtaren Musine Kokalari, që ka jetuar 22 vite internim dhe ka vdekur në Rrëshen.
Ne ndjejmë se shkrimtarët si elitë e shoqërisë, i kanë borxh mirënjohjen e thellë shkrimtares Musine Kokalari në emër të gjithë njerëzve. U kemi borxhe shkrimtarëve martirë.
Dhe ia artikuluam sot mirënjohjen në mënyrën më të denjë e fisnike, gjetëm kohë e mundësi dhe bëmë një akt që ka munguar që nga vitet 1960, kur ajo është dënuar dhe kur një turmë shqiptarësh ia shkulte edhe gjysmën e flokëve të kresë…
Sot shkrimtarët pjesëmarrës të ftuar nga Klubi i Poezise ishin mjaftueshëm të mëdhenj për të heshtë në rrugën me emrin Musine Kokalari, ishin mjaftueshëm fisnikë dhe heshtën me përulje tek vendi, ku ka qenë baraka e internimit e Musine Kokalarit.
Ecëm nëpër Rrëshen në gjurmët e Musinesë pasi ajo ka lënë shenja të pazhbëshme në atë qytet të cilin e kërkoi vetë edhe për të vdekë aty meqenëse Tiranën ia ndalonin. Bëmë nje sesion përkujtimor, u lutem edhe në Kishën e Rrëshenit për shpirtin e saj.
Unë si organizator i këtij pelegrinazhi falënderoj përzemërsisht shkrimtarët pjesëmarrës në homazhet për Musine Kokalarin.
Falënderoj në emër të të gjithë shkrimtarëve Flamur Hoxhën, që na mbështet, pasi falë kësaj mbështetje ne bëhemi bashkë dhe udhëtojmë për të nderuar shkrimtarët martirë.
Për sot falënderim të ngrohtë shkrimtarit Ndue Dedaj, Monsinjor Gjergj Metës, studjuesit Alfred Duka dhe të gjithëve që lanë diçka keq për të bërë diçka mirë, prishen një gjë për të ndreqë një gjë.
Disa foto nga qindra të realizuara sot në Rrëshen.
Faleminderit!
