Enti Rregullator i Energjisë (ERE) miratoi në fund të majit pagesat rregullatorë për 307 kompani të cilat janë të licencuar prej tij dhe që duhet të shlyejnë detyrimin që merr parasysh qarkullimin vjetor të vitit paraardhës.
Referuar vendimit, Enti ka sqaruar se subjektet kanë vetëm 30 ditë kohë për të bërë këtë pagesë që në total për të gjithë subjektet është 208 milionë Lekë. Nëse pagesa nuk bëhet në kohë atëherë ndaj subjekteve merren masa administative të parashikuara për secilën kategori ku bën pjesë i licencuari në ligjin përkatës që rregullon aktivitetin.
“Diferencat që rezultojnë nga Pasqyrat Financiare të certifikuara për vitin 2021, të konsiderohen në llogaritjen e pagesave të rregullimit të periudhës pasardhëse. Të licencuarit subjekt i këtij vendimi duhet të kryejnë pagesat rregullatore ndaj ERE, jo më vonë se 30 ditë nga botimi në Fletoren Zyrtare i këtij Vendimi, në të kundërt, do të jenë subjekt i aplikimit të masave administrative të parashikuara në nenin 42, pika 1, gërma ç), pika 2, gërma b) dhe nenit 107, të ligjit nr. 43/2015 “Për sektorin e energjisë elektrike” i ndryshuar; nenit 27, pika 1, gërma “ç” dhe nenit 106, gërma “a” (xi) e ligjit nr. 102/2015 “Për sektorin e gazit natyror”, i ndryshuar dhe nenit 5, pika 1, të “Rregullores për procedurat e vendosjes dhe reduktimit të gjobave” miratuar me vendimin nr. 125, datë 29.07.2016, të bordit të ERE-s” thuhet në vendimin e Entit.
Vendimi sqaron se për shoqëritë e licencuara që disponojnë më shumë se një licencë, të cilët nuk i kanë paraqitur pasqyrat financiare të ndara sipas aktiviteteve të licencuara për ndarjen e llogarive, pagesa rregullatore për vitin 2021 është llogaritur nëpërmjet peshës specifike të të ardhurave të deklaruara ndaj totalit të të ardhurave të sektorit të energjisë, për një nga licencat ndërsa për aktivitetet e tjera të licencuara është zbatuar automatikisht tarifa fikse e përcaktuar në pikën 6.4, të nenit 6, të “Rregullores mbi përcaktimin e miratimin e pagesave rregullatore” e ndryshuar, me vendimin nr. 129, datë 10.08.2020, të bordit të EREs.
Për të licencuarit, për të cilët pagesa rregullatore për vitin aktual është pezulluar, nëse do të ndryshojnë rrethanat ligjore, që çuan në pezullim, ky vendim do të jetë objekt rishikimi për sa i përket përllogaritjes së pagesave rregullatore që do të rezultojnë.
Më herët Enti ka pasur precedentë të subjekteve që nuk kanë shlyer detyrimet e pagesave rregullatore diçka që arrin deri në masa të tilla si heqja e licencës dhe për të cilat paraprakisht ky ent ka bërë njoftimet përkatëse. Enti Rregullator i Energjisë funksionon si një institucion i pavarur dhe pagesat rregullatorë të subjekteve janë të rëndësishme për aktivitetin e institucionit. / N. Maho.
Monitor.al
