Zhveshja e Krujës nga çdo institucion i rëndësishëm shtetëror shpreh urrejtjen e kësaj qeverie ndaj Krujës së Skënderbeut.
Drafti i hartuar nga Këshilli i Lartë Gjyqësor dhe që pritet të marrë miratimin në Këshillin e Ministrave, në planin konkret është një kalvar i vërtetë për krutanët.
Shkruaj për Krujën sepse njoh në mënyrë të saktë dhe korrekte gjithë problematikën e atij rrethi, gjeografinë dhe terrenin malor.
Di luftën e atyre banorëve për të përballuar jetën e përditshme.
Kam dijeni mjaftueshëm për numrin e çështjeve gjyqësore që trajtohen në vit.
Tani kthehem te faktet konkrete.
Me implementimin e hartës së re, Krujës i ikën gjykata dhe zhvendoset aktiviteti në Gjykatën e Faktit Tirane.
Dikush do të shprehet, se nuk është shumë larg, por distanca nuk duhet të matet nga Fushë Kruja.
Malësia e Krujës ka fshatra, që në kohë të mirë, duan të paktën dy orë udhëtim për të mbërritur në qendër të Bashkisë.
Pra, për të mbërritur në Tirane, ju duhen 3 orë e ndoshta më tepër.
Veç kësaj, ne nuk mund të harrojmë, sesa seanca zhvillohen për një çështje gjyqësore, qoftë administrative apo penale.
Një qytetar, deri sa të marr vendimin e formës së prerë për një çështje të caktuar, i duhet të udhëtoi, në itinerarin Malësi- Tirane, mbi 50 herë po qe me fat.
Dhe të gjithë e dinë, që këtu, përfundimi i gjyqeve jo pak herë kalon në “Kalendat Greke”, pra nuk mbarojnë sa të ketë jetë njeriu.
Po largësia, çfarë do të sjell ajo ?
Përgjigja dihet, konflikte sociale dhe gjyqe të tjera. Kjo është e vërteta e hidhur dhe me pasoja vijuese.
E të llogaritësh këtu, në këto ec e jake, ditët e punës që humbet, shpenzimet me naftë apo fotokopje dokumentesh, kafen e rrugës, ose biletën e mjetit udhëtues.
Bashkia Krujë sipas censusit të vitit 2017 ka 81. 772 banorë
Shqyrtohen rreth 2 mijë çështje gjyqësore në vit.
Kjo është situata, e parë vetëm sipërfaqësisht, por efektet janë edhe më të mëdha.
Nuk mund të lë jashtë vëmendjes faktin, se çdo institucion në një zonë të caktuar, ndikon në zhvillimin e asaj zone.
Jo pak vetë janë të punësuar aty si gjyqtar, nëpunës në administratë, sanitar etjer.
Njerëzit që vijnë për hallin e tyre, diku do pijnë një kafe, diku do hanë diçka, e këto janë të ardhura financiare që mbeten në qytetin tonë.
Politikat e qeverisë që kanë hequr nga Kruja çdo drejtori dhe i kanë lënë thjesht sektor, është denigruese për qytetin më historik të Shqipërisë.
Me heqjen edhe të gjykatës, shfaqet hapur urrejtja patologjike e qeverisë së majtë ndaj krutanëve antikomunistë.
