Fragment(tej tabuve) nga “Teqeja e Shterpave”.
Duhet të them se midis bukurosheve dhe zuskave kishte një armiqësi të hapur. Kur bukuroshet u thoshin zuskave, kurva, u bëhej goja kamare, ngaqë ndalonin gjatë tek shkronja «u» (jo, jo, s’dua aspak të krijoj analogji dhe të them se ajo është një shkronjë me këmbët përpjetë), kurse zuskat talleshin me vyrtytshmërinë e bukurosheve dhe thoshin se nderin e ruajnë ato femra që s’kanë plaçkë e katandi tjetër përveçse atë. Sidoqoftë, në konfliktin midis të dyja palëve ndihej instikti themelor i femrës për ta trajtuar seksin si një madem; bukuroshet: si një madem plot xeherorë e xhevaire, zuskat: si një gropë të boshatisur, brenda së cilës s’kanë mbetur as gurë gëlqerorë të zakonshëm.
