Mbas 12 orësh “bllok” për mediat, Rama nxjerr fotot…
(31 vite- 64 foto)
Plot 64 fotografi nga aktiviteti ka postuar sot në rrjetet sociale Kryeministri Rama.
Në statusin e tij ka vetëm një fjali “31 Vjet PS” dhe shoqëruar me albumin fotografik.
Ceremonia festive për 31 vjetorin e Partisë Socialiste nisi në orën 20:00 të së dielës, por si rrallëherë, Kryetari i saj, Edi Rama pati urdhëruar që mediat të ishin sa më larg dhe për rrjedhojë, pati pak informacion dhe detaje nga festa e socialistëve.
Një interesim të posaçëm kishte për prezencën apo jo të liderit historik të PS-së, Fatos Nano. Në fotot e publikuara nuk ka imazhe të Nanos, por vonë pasdite, nga gazeta “Panorama” ka qarkulluar një foto, ku ai shfaqet, pranë një bordure me libra të vjetër, në zonën e “Tajvanit”, aty ku dikur banonte.
Në emisionet e lajmeve pati më shumë komente sesa pamje nga të pranishmit apo përshëndetjet e rastit.
Gjithsesi, sot mediat dhe rrjetet sociale janë të mbushura me plot foto e shpjegime.
Kryeministri, si gjithmonë mbetet mjeshtër i propagandës, hedh aq foto sa kushdo mund të ndali te gjestet e tij.
Me dikë përqafim, me tjetrin puthje, shtrëngim duarsh, apo dalje në grup.
Kujtojmë se pjesëmarrës në aktivitet ishin edhe përfaqësues të LSI-së.
