Në takimin e thirrur sot me kryetarët e degëve në rrethe dhe drejtuesit e degëve të Tiranës, Sali Berisha ka kërkuar nga drejtuesit lokal që ta bëjnë natën ditë me punë, organizim dhe reagim.
Ai tha se regjimi monist duhet përmbysur! Të shndërrohemi të gjithë në organizatorë, në propogandues.
Fjalën e tij përpara krerëve të degëve të PD-së e mbylli me një thirrje të qartë motivuese:
“Ndaj ne do u kërkojmë shqiptarëve që të marrin në duar fatin e tyre. U përpoqën që të caktojnë një kryetar për demokratët. Dështuan. Po përpiqen që të mbajnë Ramën kryeministër. Por do dështojnë nëse ne do ngrihemi në lartësinë e misionit tonë.
Koha është të bëjmë natën ditë. Të bëjmë gjithçka për të shumëfishuar aktivitetin tonë. Kemi trashëgimi pozitive, por kemi edhe probleme për t’i zgjidhur.
Duhet të veprojmë me gjithë forcën tonë në organizim. Duhet të shndërrohemi të gjithë në organizatorë.
Duhet të shndërrohemi të gjithë në propagandistë të të vërtetave tona. Të shumëfishojmë aktivitetin tonë, në media, në rrjetet sociale dhe kudo.
Duhet të shndërrohemi të gjithë në aktivistë që dinë dhe do afrojnë çdo ditë e më shumë njerëz rreth vetes tonë.
Me përkushtim do të krijojmë frontin e përbashkët opozitar. Regjimi monist është mynxyra më e madhe që e ka pllakosur vendin. Ai duhet përmbysur me çdo mënyrë demokratike. Unë kam besim se do qëndrojmë në lartësinë e misionit dhe detyrave tona,” tha Berisha.
