Republikani Mediu, në fjalën e tij, në seancën e sotme u shpreh se Shqipëria u vendos sërish në listën gri për pastrimin e parave.
Ai ndali gjithashtu te interesat ruse në rajon.
“Sjell në vëmendje disa konstatime të rëndësishme. FMN ka ngritur dyshime për pastrim parash në tregun e pasurive të paluajtshme. Shqipëria u vendos sërish në listën gri për pastrimin e parave. Sot bota është në kërcënimin e pasigurisë ushqimore. Çmimet rriten progresivisht, sado përpiqemi t’i mohojmë ato.Rritja e çmimit të naftës dhe gazit ka ndikuar dhe do të ndikojë. Politikat fiskale janë të disfavorshme, kemi taksat më të larta në rajon. Vlerësoj dhe jap mbështetje për çdo marrëveshje të Shqipërisë me çdo kompani amerikane për investime”
Ai, gjatë fjalës së tij, diskutoi edhe për çështjen e Ballkanit të Hapur dhe raportet me fqinjët.
“Nuk jemi të imunizuar nga interesat e Rusisë, ne duhet të flasim dhe të shohim ç’po ndodh në Serbi, Bosnje Hercegovinë , Kosovë dhe në Malin e Zi. Çdo nismë duhet të frenojë aksesin e Rusisë dhe Kinës në rajon, ndryshe kemi vënë në diskutim interesin kombëtar”, tha ai.
