Kryeministri Edi Rama është nderuar me çmimin prestigjioz “Joan Ganz Cooney Global Leadership Award” në darkën vjetore të Sesame Workshop.
Motivi i akordimit të këtij çmimi ka të bëjë me pritjen që Shqipëria u bëri shtetasve afganë të ikur nga vendi i tyre për shkak të dhunës së talebanëve.
Pas marrjes së çmimit, Rama tha se ajo çfarë ndjeu përballë kur pa hezitimin dhe refuzimet, që vinin nga vende më të pasura për t’iu hapur dyert afganëve ka vetëm një emër: “Turp”.
Ai theksoi se përgjigjen e dyerve të hapura për afganët e gjejmë në historinë tonë, që është një histori mikpritjeje, një histori respekti karshi njerëzve në nevojë, një histori e mishëruar në kushtetutën tonë të parë, kodin e shqiptarëve, ku shkruhet: “Shtëpia e shqiptarit është e Zotit dhe e mikut”.
