Komisioni i Ligjeve është mbledhur mëngjesin e kësaj të hëne, për të formalizuar djegien e raundit të dytë për zgjedhjen e presidentit, për shkak se opozita nuk dërgoi asnjë emër, deri pasditen e djeshme, kur ishte dhe afati i fundit ligjor.
Deputeti Eduart Ndreca lexoi konkluzionet e Komisionit të Ligjeve, të cilat do ti dërgohen Kuvendit në seancën e orës 18:00.
“Edhe për këtë raund nuk ka kandidatura, raundi i dytë quhet i kryer”, u shpreh kryetarja e Komisionit të Ligjeve Klotilda Bushka.
Partia Demokratike u tërhoq të premten nga procesi për zgjedhjen e kreut të shtetit në raundin e dytë me akuzën ndaj maxhorancës se prishi marrëveshjen e arritur ditën e mërkurë, se në 3 raundet e para e drejta e propozimit të emrave i takonte vetëm opozitës.
Kushtetuta përcakton se janë pesë raunde për zgjiedhjen e Presidentit. Në tre raundet e para kërkohet një shumicë prej 3/5, 84 vota, ndërsa në dy e tjera, të katërtin dhe të pestin, presidenti mund të zgjidhet me 71 vota. Duke qenë se dy raundet e para janë djegur tashmë, palët kanë
edhe një shans të fundit për gjetjen e një presidenti konsensual.
Raundet nga njëri tjetri duhet të zhvillohen brenda 7 ditëve, që do të thotë se Presidenti i ri i Republikës maksimalisht në gjysmën e dytë të muajit qershor do të jetë i zgjedhur, duke qenë se data e fillimit të procesit është konsideruar data 10 maj. Votimi për secilin raund bëhet i fshehtë dhe pa debate
Opozita nëpërmjet kreut të grupit të saj, Enkelejd Alibeaj ka thënë se nuk do të ketë më diskutime me maxhorancën.
