Kryeministri Edi Rama ka ndarë sot në rrjetet sociale një foto nga takimi me homologen italiane Giorgia Meloni në Romë, duke vlerësuar shumë marrëdhëniet mes dy vendeve dhe në mënyrë të posaçme qeverinë aktuale.
Veç fotos që ka shpërndarë kreu i qeverisë shqiptare, në rrjetet sociale po qarkullon edhe foto e momentit të takimit mes dy kryeministrave, ku duket se Rama përkulet para Melonit, sikurse ka bërë edhe herë tjetër.
Në postimin e tij, Rama thekson se Italia ka qenë gjithmonë pranë Shqipërisë, por qeveria Meloni bën një dallim të fortë për zhvillimin dhe sigurinë e Shqipërisë
“Të gjitha qeveritë e Italisë në 35 vitet e fundit kanë qenë posaçërisht dashamirëse ndaj Shqipërisë, por asnjë qeveri italiane nuk ka vënë në lëvizje një program kaq të ngjeshur bashkëpunimi strategjik me Shqipërinë, sa qeveria e Giorgia Melonit. Afrimi i mëtejshëm me Italinë përmes projekteve të mëdha e konkrete sjell më shumë zhvillim e siguri për Shqipërinë” shkruan Kryeministri Rama në rrjete sociale.
