Ndërkombëtarët, që fluturojnë drejt Shqipërisë për të dhënë konferenca shtypi, duhet të hartojnë një manual proteste për popullin shqiptar që nuk pajtohet me qeverisjen e Edi Ramës
Pasi ta kenë hartuar këtë manual, të japin urdhër që ky i fundit të lexohet me zë të lart nga shefi i kuadrit çdo ditë në mbledhjen e mëngjesit në çdo ndërmarrje dhe fabrikë në Republikën Popullore Socialiste.
Populli shqiptar, që nuk pajtohet me qeverisjen e Edi Ramës, do t’i zbatojë me përpikmëri udhëzimet e shkruara në manual.
Ditën e protestës populli opozitar do të vishet mirë dhe do të ecë krejt i qetë në bulevard. Protesta do të duket si një shëtitje e qetë ku populli me një zë të butë dhe të shtruar ngre një pyetje për kryeministrin: Zoti kryeministër, ju lutem a mund të na konsideroni të denjë për vëmendjen tuaj teksa ngremë pyetjen: Si ka mundësi që taksat tona vidhen ditën për diell nga bashkëpunëtorët tuaj dhe ju thoni se nuk dini gjë?! Si ka mundësi që njerëz të shpallur në kërkim nga drejtësia vazhdojnë të fitojnë miliona euro nga tenderat e zhvilluara nëpër institucione shqiptare?!
Populli i kulturuar shqiptar, në ndryshim nga popujt e pagdhendur evropianë, nuk do të revoltohet duke u përplasur me policinë, apo duke i vënë flakën heshtjes së kryeministrit, por do të vazhdojë ecjen në bulevard duke zbatuar pikë për pikë manualin për protestë të hartuar nga ndërkombëtarët.
Ndërkombëtarët do ta përshëndesin popullin opozitar për kulturën e dëshmuar në protestë dhe madje në Bashkimin Evropian do të shpallet edhe një konkurs i cili çmimin e parë do t’ia japë popullit që vidhet më shumë, por që proteston më bukur.
Çmimi i parë do t’i jepet popullit shqiptar si populli që vidhet më shumë nga popujt e tjerë evropianë, por që proteston më bukur se çdo popull tjetër në Evropë.
Ndërkombëtarët do të pushtojnë ekranet dhe në prani të kryeministrit mes batutave dhe shakave do të deklarojnë; Merita e plaçkitjes dhe vjedhjes i takon qeverisjes, por Arti i Protestës së heshtur dhe së qytetëruar i takon Opozitës. Me këtë ju keni bërë një hap para drejt Evropës.
Konferenca e shtypit do të mbyllet dhe faktori ndërkombëtar do të shijojë një vakt të mirë me gatime tradicionale shqiptare dhe me një verë nga kantina e pasur e Gysit.
Post Scriptum- Në ndajmuzg faktori ndërkombëtar do t’i hipë avionit dhe duke parê Shqipërinë nga lart do të nënqeshë dhe do të thotë më vete; Sa e shijshme është Shqipëria!
Nga Elona Caslli
