Ka përfunduar numërimi në 5 bashkitë e vendit dhe kanë dalë rezultatet.
Vlora ishte bashkia e parë që shpalli rezultatin përfundimtar, me pjesëmarrjen më të ulët në këto zgjedhje, 12.5% të votuesve me të drejtë vote. Kandidatja e Partisë Socialiste, Brunilda Mersini, fitoi mandatin me 78% ose 15,672 vota.
Daniel Sota, kandidati i pavarur i mbështetur nga Partia Demokratike dhe aleatët mori 2,333 vota, 11.68%, ndërsa këshilltari Gjergji Nika, që garoi i pavarur siguroi 1,975 vota, 9.88%.
Në Bashkinë e Cërrikut, kandidati i Partisë Socialiste, Florenc Doka, fitoi me 6,201 vota, ose 66.22% të totalit. Kandidati i pavarur i mbështetur nga PD, Amarildo Hoxha, mori 1,888 vota, ndërsa kandidati i subjektit “Shqipëria Bëhet”, Eligert Hima, mori 1,275 vota.
Në Bashkinë e Beratit, kandidati i Partisë Socialiste mori 13,050 vota, që përbëjnë 83.35% të totalit. Kandidati i mbështetur nga PD, Pavlo Shkarpa, mori 2,607 vota ose 16.65%.
Në Tepelenë, kandidati i PS-së, Gramos Sako, fitoi me 3,261 vota ose 77.85%. Kandidati i mbështetur nga PD, Gabriel Guma, mori 928 vota.
Në Bashkinë e Matit, kandidati i PS-së, Altin Bojini, fitoi me 7,425 vota. Kandidati i pavarur i mbështetur nga PD, Eduart Brahilika, mori 3,184 vota ose 27.02%. Kandidatja e pavarur Suzana Pasha, që më parë ka qenë pjesë e PS-së, siguroi 549 vota ose 5.17%.
Në total, në pesë bashkitë ku u zhvilluan zgjedhjet e pjesshme morën pjesë 18.45% e votuesve nga 334,539 qytetarë me të drejtë vote.
Pjesëmarrja më e lartë u regjistrua në Mat me 39.36%, ndjekur nga Tepelena me 34.63%, Cërriku me 25%, Berati me 19.98% dhe Vlora me 12.54%.
