Në raportimin e saj në Kuvend, i shtrova dy pyetje znj. Pranvera Strakosha, Komisionere për Mbikqyrjen e Shërbimit Civil.
E para kishte të bënte me rastin e freskët dhe flagrant të shkeljes së ligjit, të denoncuar së fundmi ku shihen jo pak, por katër drejtorë të përgjithshëm të Ministrisë së Arsimit të angazhuar si delegatë në zyrat e Partisë Socialiste në Tiranë, në njësinë nr.9!
E dyta me skandalin e publikuar në të gjitha mediat dhe të denoncuar tashmë në Prokurorinë Tiranë, ku Drejtoresha e Qendrës Kombëtare të Inovacionit dhe Ekselencës, u kap në flagrancë në një zyrë ilegale të PS-së në fushatë, aty ku ne kemi dyshimin e arsyeshëm se bëhej shit-blerje votash, krim zgjedhor dhe patronazhim vote!
Në kushtet e një partie shtet që nuk pyet as për Kushtetutën, as për parlamentarizmin, e as për ligjin, shtrohet si nevojë emergjente funksionalizimi i disa institucioneve të pavarura kushtetuese, të cilat jo vetëm që nuk do duhej t’i bënin fresk qeverisë, por do duhej të denonconin fort rastet e abuzimit me ligjin, në benefit të të drejtave të punonjësve të administratës dhe interesit publik në përgjithësi.
Fatkeqësisht administrata publike është kthyer në një formacion militant politik që mision primar nuk ka shërbimin publik por rritjen e hambarit të votave për partinë në pushtet.
Me këtë standard antidemokratik dhe antikushtetues, patronazhimi kthehet në detyrën kryesore ndërsa arsimimi i fëmijëve, ilaçet në spitale, shtrimi i rrugëve apo ndihma sociale kthehen në prioritete të dorës së dytë, në mos burime korrupsioni.
Ky është realiteti që e shohin dhe ndjejnë në lëkurë të gjithë qytetarët shqiptarë, përveç institucioneve që zgjedhin të mbyllin sytë e të bëjnë të paditurin.
