Pas reagimit të Presidencës, ku Presidenti Bajram Begaj e quajti kërkesën për shkarkimin e tij një “sulm politik”, Kryetari i Grupit Parlamentar të PD-së, Gazment Bardhi publikoi dokumente që, sipas tij, hedhin dyshime mbi përfitime të paligjshme dhe konflikt interesi në Presidencë.
Bardhi, deklaroi se djali i Presidentit paguhet nga kompania “ANSIG”, me të cilën Presidenca ka kontrata për prokurimet e institucionit. Pagesa arrin në 30 mijë euro në vit, ndërkohë që djali jeton në Gjermani dhe punon si mjek atje.
Reagimi i plotë i Bardhit:
Si gjithmonë, Bajram Begaj foli, por nuk tha asgjë!
Çfarë e pengoi “Doktorin e Mrekullive”, njëherazi Presidenti, të pohojë se djali i tij paguhet pa qenë fare në Shqipëri nga kompania me të cilën Presidenca ka kontratë për të gjitha prokurimet e institucionit? Sado që të shmanget e të përdridhet Presidenti i çnderuar, përgjigja është vetëm një: Korrupsioni dhe përfitimi i paligjshëm i Presidentit!
Fotot më poshtë janë marrë nga dokumente zyrtare të deklarimit të pasurive dhe nga Thesari i Shtetit. Një shpjegim i shkurtër i tyre: I biri i Presidentit jeton në Gjermani, ku paguhet nga një spital si mjek. Por, 6 muaj pas emërimit të babait president, paguhet edhe në Shqipëri nga kompania e sigurimeve, me të cilën ka kontratë prokurimi presidenca. Pagesa është 30 mijë euro në vit.
Ky është vetëm një nga rastet skandaloze për të cilat kemi kërkuar shkarkimin e Presidentit të çnderuar Bajram Begaj. Ka edhe të tjera. Prandaj, Kuvendi nuk mund të mbyllë sytë përpara korrupsionit, që nis nga maja e shtetit.
