Kryeministri Edi Rama ka mbledhur sot Asamblenë Kombëtare të Partisë Socialiste.
Sikurse ishte folur prej disa ditësh, ai sot do të shpall dhe emrat e anëtarëve të rinj të kabinetit 4 të qeverisjes së tij.
Gjatë fjalimit në Asmble, Rama u shpreh se pushteti i ri i drejtësisë, përfshirë SPAK-un dhe GJKKO-n, shfaq herë pas here “shenja të sëmundjes së vjetër”.
Ai kritikoi punën e disa prokurorëve dhe gjyqtarëve, duke i cilësuar disa prej tyre “dritëshkurtër, mendjengushtë dhe me mungesë ulëritëse integriteti”, që sipas tij dëmtojnë shëndetin e sistemit demokratik.
Pjesë nga fjala e Ramës: Ia kemi lënë pushtetit gjyqësor që t’i qeverisë vetë organet e veta, të zgjedhura krejtësisht jashtë vullnetit të partive politike. Kush flet për kapje të pushtetit nga ana jonë, me urdhra nga lartë, ose nuk di çfarë flet, ose nuk do të pranojë të vërtetën shumë të madhe të një ndryshimi që në historinë e këtij vendi do të shënohet si epokal, për një vend që nuk ka pasur kurrë pavarësi të prokurorëve dhe gjykatësve. E kam ditur që kjo tërheqje e plotë nga fusha e gjyqësorit, do të sillte dhimbje dhe do na bënte dëshmitarë të një lindje dhe të rritje të vështirë, të krijesës së drejtësisë së pavarur, që për 100 e kusur vjet nuk ishte as e lirë, as e pavarur e as e paanshme. Por ne do t’i durojmë të gjitha dhimbjet e këtij procesi historik të pavarësisë së drejtësisë. Qoftë se vijnë nga mëkati i atyre prej nesh, ose nga atyre që gjykojnë të pavarur ndaj nesh. Ne do durojmë kur ato dhimbje vijnë nga helmi i atyre të tjerëve që na akuzojnë se ne e kemi kapur këtë drejtësi, që për herë të parë po godet njerëz me pushtet politik. Kjo e drejtësisë është prova më e egër e zjarrit të Partisë Socialiste.
