Presidenti i Ukrainës Wolodymyr Zelenski ka mbajtur sot takime konsultuese me krerët e disa vendeve evropiane si dhe komisioneren e BE Ursula von de Leyen. Ata kanë biseduar edhe për paraqitjen e Zelenskit sot në takimin me presidentin amerikan Donald Trump.
Por presidenti Trump ka shtuar presionin ndaj Zelenskit. Ai tha se lufta “mund të përfundojë menjëherë” nëse Zelenski pranon disa nga kushtet e paraqitura prej Vladimir Putinit në Alaska.
Presidenti rus ka kërkuar ndër tjerash lëshime territoriale, futjen e gjuhës ruse si gjuhë zyrtare dhe mosanëtarësimin e Ukrainës në NATO.
“Presidenti ukrainas mund të porfundojë luftën menjëherë, nëse do. Ose mund të vazhdojë luftën”, shkruan presidenti Trump në rrejtin e tij Truth Social.
Presidenti Trump duke folur për Krimenë tha se “disa gjëra më nuk do të kthehen kurrë si kanë qenë”. Ai kundërshtoi edhe anëtarësimin e Ukrainës në NATO.
Për gjendjen në Krime dhe marrjen e Krimesë nga Rusia ai fajësoi presidentin e atëhershëm amerikan Barack Obama, i cili “ka pranuar gjendjen faktike”. Ndërsa për anëtarësimin e Ukrainës në NATO tha se nuk vjen në shprehje.
Presidenti Zelenski ka kërkuar vendosjen e armëpushimit dhe garancat e vendeve perëndimore për sigurinë në Ukrainë.
Takimi i sotëm në Shtëpinë e Bardhë, ku kanë shkuar edhe krerët e NATO-s, Gjermanisë, Francës, Britanisë së Madhe, Italisë dhe disa vendeve të tjera konsiderohet si shumë i rëndësishëm për të ardhmen e Ukrainës dhe për përfundimin e luftës agresive të Rusisë.
Nga DW Shqip
