Basir Çollaku/ PD nuk është “armike” e PD

Opozitë në mandatin e katërt është betejë ku rezistenca kërkon gladiatorë të përballjes. Natyrisht jo me prioritet muskujsh. Mandat gladiatori që nuk fitohet me mandat, por me mbidozë idealizmi.
Përse?!
Sepse mazhorancë sot është një ish-parti e shkrirë me elementë të shumtë të inkriminuar dhe me fuqi financiare marramendëse. E përdorjes së çdo pushteti në kufij ekstrem të shkeljes e shpërfilljes së ligjit. Është vetë Mafia.
Kur Reganin e pyetën përse u largove nga Partia Demokratike, ai korrektoi konstatimin me përgjigjen: ” ..nuk u largova unë nga Partia Demokratike, por u largua Partia Demokratike nga unë..” Kjo shkujdesje duhet të marrë vëmendje në disa episode me peshë në opozitëbërje.
Post 11 maji..!!
Po. Ajo datë nuk ishte zgjedhje. Nuk ishte garë. Ishte zaptim i pushtetit dhe Mafias me kandidatë të përbashkët. Unë kam qenë në terren edhe për shkak të profesionit jam bindur se sasia e krimit shkrirë me ushtrinë e Edi Ramës, ishte tronditëse. 50 deputetë të opozitës janë mbijetesa dhe fortesa e PD. Por jo e vetmja. Po në mbi 500 mijë vota janë votuar shumë edhe të pamandatuar si deputetë. Madje për shkak të formulës nuk mund të mbajë monopol të fituesit Deputeti e jo Partia. Struktura e anëtarësisë, megjithë luhatjet ka sakrifikuar shumë. Ka prodhuar rezultat ndonëse jo të dëshiruar. Ka aksione politike të mbetura jashtë Kuvendit të cilat shpesh janë më cilësore se të përfshirët. Por ky është kompromis dhe tallaz partiak. Analiza pas zgjedhjeve është ngjashmëri me raportet e ndërkombëtarëve, të cilët kalojnë por nuk sanksionojnë. Ka jo pak deputetë skeptikë të dyzuar në PD, ndaj idesë së një zgjerimi, ku partia formatohet me funksionarë ku ata nuk kanë poste. U ngjan si një hollim pushteti. Kështu ata janë kundër votës së demokratëve. Sepse ajo votë nuk ishte vetëm për 50 të zgjedhur. Ishte dhe është për të gjithë PD. Për çdo emër. Disa ishin fitues të renditjes jo të ngjitjes. Ajo votë kërkon përfaqësim më tepër se aq mandate në parlament. Kjo i sjell energji të duhura opozitës. Shumë deputetë të sotëm janë amnistuar nga kimia e humbur elektorale për shkak të logos së PD. Disa firo janë edhe pasojë e tolerancës përtej partiake. Për të qenë opozitar i mirë nuk të mjafton as duhet domosdoshmërisht një mandat. Qoftë në Parlament apo forumet drejtuese partiake. Por nëse i ke të dyja dhe mungon si opozitar i shfaqur, atëherë problemet janë serioze. Nëse hesht. Strukesh. Flirton. Bën si i fortë në seancë dhe telefonin për falje pas saj. Përkulesh oligarkëve kur të rrëshket përmendja e enrit se ishte deklaratë politike. Kullot në zona gri e i turresh të ngjashmit. Bën biznes me fuqinë e votuesit. Pandeh paprekshmëri apo pazëvëndësueshmëri. Trembesh prurjeve ndryshe. Ideve dhe produkteve të ndjeshme, sidomos me kartë të fortë morale, si një mungesa ulëritëse e tregut politik, atëherë ti kushdoqofsh me çfarëdo mandati në Kuvend apo Parti, je “armiku” i PD. Koha e pastrimit të shtëpisë e përmendur disa herë nga doktor Berisha, duhet të jetë koha e fuqizimit të shtëpisë. Fuqi nuk janë emra pretendues për tu bërë post-Berishë. Sado nëpër muzgje tubohen e ëndërrojnë mëngjese lideri. Nuk duhet të vrapojnë për të mundur njëri tjetrin. Statuti nuk është pasaportë fitoreje, sepse në uthull e mbajnë shumë nga lexuesit. Ofrojuni PD-në demokratëve dhe opozitarëve, e jo ta largoni atë prej tyre. Shpesh fitohet duke humbur diçka që nuk e përdor..!!