Është Prof. Gjok Vuksani, Shef i Departamentit të Hortikulturës dhe Arkitekturës së Peizazhit në Universitetin Bujqësor të Tiranës që shkruan:
Tiranë, 26 qershor 2025 – Për herë të parë në Shqipëri, do të organizohet Forumi Ndërkombëtar me temën “Arkitektura e Peizazhit në Shqipëri – Sfida dhe Potenciale”, një ngjarje e rëndësishme akademike dhe profesionale që synon të vendosë arkitekturën e peizazhit në qendër të diskutimit publik dhe shkencor.
Veprimtaria organizohet nga Njësia e përkohshme e kërkimeve gjeografike, në bashkëpunim me Departamentin e Hortikulturës dhe Arkitekturës së Peizazhit të Universitetit Bujqësor të Tiranës, si dhe me Shoqatën Shqiptare të Arkitektëve të Peizazhit (SSHSHA).
Forumi do të zhvillohet më 26 qershor 2025, në sallën “Aleks Buda” të Akademisë së Shkencave, duke nisur nga ora 09:00.
Ngjarja do të ketë një karakter ndërkombëtar, me pjesëmarrjen e Presidentes së Federatës Europiane të Arkitektëve të Peizazhit, si dhe përfaqësuesve të institucioneve akademike, profesionistëve të fushës dhe autoriteteve publike.
Forumi synon të hapë një debat të thelluar mbi sfidat e urbanizimit, nevojën për mbrojtjen e peizazheve natyrore dhe kulturore, si dhe potencialin e arkitekturës së peizazhit për zhvillimin e qëndrueshëm të hapësirave urbane dhe rurale në Shqipëri.
