Anëtarja e Krysisë së PD, Jozefina Topalli, ka dhënë mesazhin e saj në protestën maratonë të demokratëve në mbështetje të liderit të opozitës Sali Berisha i cili ndodhet në arrest shtëpie pas vendimit të gjykatës të dirigjuar nga Edi Rama.
Topalli theksoi se situata në Shqipëri nuk i ngjan asnjë vendi tjetër në botë, pasi nuk ka vend në NATO apo Europë ku të arrestohet lideri i opozitës pa akuzë. Sipas Topallit, në Shqipëri, organi i cili duhet të ishte akuza, është kthyer në avokatin më të madh të korrupsionit dhe skandaleve më të mëdha të qeverisë.
“Së pari dua të falënderoi çdo burrë, çdo gruan dhe çdo fëmijë që prej më shumë se 1 muaj e gjysëm janë këtu në mbrojtje të kauzës më të veçantë të këtyre 3 dekadave.
Unë dua t’ju them faleminderit secilit prej jush për kurajën për rezistencën. Ne kemi mësuar se kur padrejtësia bëhet ligj, rezistenca bëhet detyrë dhe askush më shumë se ju nuk e ka zbatuar këtë të vërtetë të madhe.
Në fakt në vendin tonë po ndodhin gjëra shumë të çuditshme. Kush e kishte imagjinuar në 20 shkurt të 1991 se pas 32 viteve ne do mblidhemi në një kauzë të jashtëzakonshme për të mbrojtur opozitarizmin.
Opozita është njësia matëse e pluralizmit. Por çfarë ka ndodhur te ne?
Të bësh opozitë në Shqipëri është sublime për PD dhe jo për forcat e tjera. Është sublime, kjo ka qënë në 1997-2005 dhe gjatë kësaj periudhe.
Për 8 vitet e para sigurisht që kishte një problem brenda vetë opozitës por pastaj këta kishin kuptuar një gjë se nqs nuk do blinin kryetarin e opozitës, ata do të arrestonin kryetarin e opozitës dhe duke arrestuar kryetarin e opozitës ata kujtonin se do të shkrinin PD. Por prania e juaj këtu ka vërtetuar të kundërtën.
Jo vetëm që nuk shkrihet opozita dhe PD por përkundrazi ka mobilizuar çdo qelizë, çdo besim çdo parim çdo vlerë që gjithsecili prej nesh beson në pluralizmin dhe demokracinë dhe mbi të gjitha se ne shqiptarët edhe kur heshtim flasim, ne shqiptarët nuk ulim kokën, nuk ulim qafën sepse ne i njofim mirë historinë dhe pasojat e diktaturave.
Këta e filluan duke na marrë vulën. Më thoni se në cilin vend të botës, të NATO-s, të Europës ndodh që kryetari i një partie në opozitë të caktohet me vendin gjykate. Dini ndonjë? Në Europë jo, as në Afrikë nuk njof, as në vende të tjera nuk e njof.
Ne kemi mësuar se demokracia funksionon përmes mazhorancës kur mazhoranca e demokratëve kanë vendosur që Sali Berisha të jetë kryetari i opozitës, nuk ka vendim gjykate popullore që ta zhbëjë një gjë të tillë.
Ne kemi mësuar po ashtu se lirinë nuk ta dhuron njeri, as drejtësinë nuk ta dhuron njeri.
Ne duhet të bëjmë beteja dhe duhet të bëjmë dhe luftë për ta fituar një gjë të tillë. Dhe ju jeni mbledhur sot se e ndjeni që është bërë padrejtësi ndaj shoqërisë në përgjithësi dhe ndaj opozitës në veçanti. Pse është bërë padrejtësi?
E para sepse ne kemi kryetarin e opozitës të arrestuar pa akuzë. Dini ndonjë vend që kryetari i opozitës të jetë arrestuar pa akuzë?
Sot ne lexuam lajmin se Putin ndalonte rivalin e tij që të merrte pjesë në zgjedhje, gjë që këta e bënë 6 muaj në zgjedhjet lokale kur hoqën emrin e kryetarit të opozitës nga fletët e votimit.
Në fakt situata është edhe më e rëndë sesa edhe kaq. Ajo që po ndodh çdo ditë dhe ndoshta njerëzit e kuptojnë më mirë se më qartë se e kuptonin 2 vite përpara sepse kishin një zë që i luftote aty ku ato kishin frikën më të madhe.
Inceneratorët janë skandali më i paimagjinueshëm që mund të realizohej në një vend që mund të quhej demokratik. Korrupsioni më i tmerrshëm dhe keni dëgjuar se ka një lëvizje reale për të ndjekur apo për ta sqaruar? Copëzimi i kësaj çështje ka bërë në fakt që ai që duhet të ishte akuza është kthyer në avokatin më të madh të korrupsionit dhe skandaleve në vendin tonë”, u shpreh Topalli.
