Deputetet demokrate, Eralda Tase Bano dhe Andia Ulliri, kanë përfaqësuar Kuvendin e Shqipërisë në Konferencën Globale Parlamentare e mbajtur në Stamboll.
Është deputetja Bano ajo që e ka përshkruar aktivitetin në një postim në rrjetet sociale.
Ja postimi i saj:
Përmirësimi i legjislacionit për mbrojtjen e emigrantëve vjen si domosdoshmëri në kushtet aktuale, ku krahas emigrantëve të vendeve nga Afrika dhe Azia, po ndodhin lëvizje të mëdha emigruese nga Ukraina.
Në këtë kuadër u organizua në Stamboll:
#Global Parliamentary Conference #
Konferenca Globale mbi Migracionin dhe Refugjatët.
Pata kënaqësinë dhe përgjegjësinë që së bashku me kolegen Andia Ulliri të përfaqësonim Kuvendin e Shqipërisë në këtë takim.
Në seancat e kësaj veprimtarie diskutuam mbi nevojën e përmirësimit të legjislacioneve kombëtare për mbrojtjen e emigrantëve dhe detyrimit për bashkëpunim ndërkombëtar.
Në kushtet e sotme, ku paqa është vënë në dyshim, bashkërendimi i qëndresës dhe mbështetjes reciproke ndërmjet popujve dhe përfaqësuesve të tyre shfaqet si primare.
Referuar muajve të fundit ku një pjesë e Evropës Lindore ndodhet nën gjëmimet e luftës, nevoja për këtë bashkëpunim është më e fortë se kurrë.
Për të qenë konkrete, sulmi i paprovokuar dhe brutal i Rusisë ndaj popullit paqedashës të Ukrainës ka krijuar realitete trishtuese në Evropë dhe fate tragjike në popullin ukrainas.
Kjo luftë ka “prodhuar” rreth 7 milionë emigrantë, të cilët kërkojnë mbështetje nga të gjitha vendet demokratike.
Pikërisht kjo, u theksua edhe nga Kryetari i Parlamentit të Turqisë, por edhe nga 300 parlamentarët, që morën pjesë në këtë takim të rëndësishëm.
Duke përfituar nga idetë e qarta dhe problematikat që u trajtuan në diskutime, ne, dy deputetet shqiptare, falënderuam Kryetarin e Parlamentit të Turqise, Z. Mustafa Sentop për organizmin e kësaj konference, për mikpritjen e treguar dhe vëmendjen ndaj delegacionit të Kuvendit të Shqipërisë.
