Kisha e Shën Mërisë ndodhet përfundi Kalasë së Danjës, e ndërtuar rreth viteve 1300 në luginën e malit të Dejës (Principata e Danjës) dhe është shpallur Monument Kulture i kategorisë së I.
Kjo kishë është vizituar në prag të martesës nga heroi ynë kombëtar Gjergj Kastrioti së bashku me Donikën (thuhet se edhe kanë kurorëzuar martesën) ndërsa në afërsi të saj gjendet varri i Lekë Zaharisë (Princi i Danjës).
Kisha e Shën Mërisë është një ndër kishat më të vjetra në Shqipëri që i ka rezistuar shkatërrimeve ndër shekuj,derisa rregjimi komunist pas shumë tentativash për ta prishur në vitin 1969 me një akt ç’njerëzor, barbar e të paimagjinueshëm e shkatërron me anën e lëndëve plasëse (dinamit).
Kisha është ndërtim tipik i stilit Gotik të shekullit XIII, e gjitha me gurë katrorë të latuar, me dysheme e me tavan dërrasash dhe e mbuluar me tjegulla. Sot ruhen përbri Kishës së re të ndërtuar pas viteve ’90 vetëm themelet e Kishës së vjetër në lartësinë e zoklaturës, baza e altarit, muratura e harkuar e absidës dhe portiku hyrës.
Kisha e Shën Mërisë për rëndësinë kombëtare të vlerave historike, fetare e kulturore që trashëgon është stampuar në kartëmonedhën 1000 lekëshe dhe së fundmi është vendosur si simbol në stemën e Bashkisë Vau Dejës!
