Stina e ftohtë, virozat , ndotja ambjentale, grimcat e karbonit në ajër, duhanpirja etj, shkaktojnë probleme të shumta e të ndryshme në rrugët tona të frymëmarrjes.
Janë plot individë që kanë probleme kronike në mushkëri, pasojë edhe nga infeksioni i covid-19, i cili në disa raste ka lënë pasoja që do të zgjasin gjithë pêr gjithë jetën, të tilla si bronkite kronike, bronkoektazi, fibrozë pulmonare, pleurite etj. të cilat reduktojnë kapacitetin respirator, ulin performancën fizike të organizmit, rëndojnë sistemin kardiovaskular, etj.
Problemet e mushkërive karakterizohen nga një ose disa simptoma të vazhdueshme të frymëmarrjes të tilla si: kollë, sekrecione me ngjyrë, vështirësi në frymëmarrje, frymëmarrje me zhurmë, çrregullime gjumi, etj.
Në sëmundjet kronike të mushkërive mund të përfshihen edhe faktorë gjenetikë dhe infeksione të përsëritura të frymëmarrjes.
Më ndodh të trajtoj shpesh pacientë që kanë kaluar covid-19 të cilët kanë zhvilluar edhe shumë simptoma ekstra pulmonare, të tilla si lodhje kronike, mungesë oreksi, humbje të peshës të cilat lidhen me përkeqësimet e sëmundjes për shkak të infeksioneve bakteriale dhe virale të cilat shpeshtohen.
Unë i nxis miqtë e mij, sidomos pacientët që të ndërpresin duhanin dhe rrisin e aktivitetin fizik, në mënyrë që të mund të rrisin kapacitetin respirator dhe performancën e mushkërive.
Mjekimi me suplemente bimorë, bronkodilatorë dhe me barna anti-inflamatore (të përdorura të kombinuara ose vetëm) janë terapitë kryesore të disponueshme.
Përdorimi rutinë i antibiotikëve shpesh komplikon situatën, mbivendos infeksionet mykotike, rrit reziztencën antimikrobike, zvogëlon mundësinë për të trajtuar një infeksion jetëkërcënues.
Dr. Ilir Allkja
