Policia e New York-ut, parakalon me flamurin Kuqezi në rrugën “Gjergj Kastrioti” në Bronx
Një rruge në Bronx të New Yorkut është emëruar sipas heroit tonë kombëtar, Gjergj Kastrioti Skënderbeu. Vendimi i marrë në 100-vjetorin e vendosjes së marrëdhënieve Shqipëri-SHBA, është pritur me shumë gëzim e krenari nga komuniteti shqiptar në atë zonë.
Me flamuj kuq e zi e veshje kombëtare, fëmijë, gra e burra kanë dalë për të festuar. Ndërsa gjallërisë së festës i është bashkuar edhe Policia e New York-ut. Të hipur në kuaj, me flamuj amerikan dhe kuq e zi, kalorësit e trupës kanë inauguruar rrugën “Gjergj Kastrioti” me një parakalim.
Ceremonisë i është bashkuar edhe kryebashkiaku i New Yorkut, Eric Adams. Përmes një shkrimi në Twitter, Adams thuri lavde për shqiptarët, duke theksuar se ata
janë një komunitet i madh që
gjallërojnë qytetin.
“Ne jemi shtëpia e komunitetit më të madh shqiptar në Amerikë. Shqiptaret në SHBA janë pronarë
biznesesh , punëtorë të vijës së parë, që e bëjnë qytetin tonë të gjallë. Ishte një nder t’u bashkohesha sot për të festuar përkujtimin e heroit kombëtar shqiptar, Gjergj
Kastrioti Skenderbeu”, ka shkruar Adams.
Ndër veprimtarët që kontribuan në realizimin e punës për vendosjen e
emrit të Gjergj Kastriotit rrugës në Bronx është ish-antari i këshillit bashkiak të New York për Queens, Mark Gjonaj, që njihet edhe si person me shumë peshë tek bashkëkombësit e tij.
Përveç emërtimit që mori rruga e re, një tjetër rrugë në Nju Jork mban emrin e veprimtarit të shquar shqiptar, Fan Noli.
