Nga 22 protestues të ndaluar në Durrës, prokuroria ka përdorur dorën e rëndë dhe ka ka kërkuar për 19 prej tyre masën arrest me burg ose në shtëpi. Vetëm për tre persona është kërkuar detyrim paraqitjeje.
Shumë prej të ndaluarve po deklarojnë para gjykatës se janë dhunuar gjatë shoqërimit dhe në paraburgim. Kjo pa folur për të miturit dhe studentët e dhunuar me shkopinj gome në kokë, ndaluar e të liruar pa gjyq, apo të dhunuar e trysnuar pranë shkollave për t’i frikësuar e shkurajuar nga e drejta kushtetuese e pjesmarrjes në protestë.
I bëj thirrje prokurorisë që në vend të dorës së hekurt mbi të rinjtë protestues, të hetojë dhunën policore.
I bëj thirrje gjyqtarëve të ngrihen në nivelin e detyrës sublime të mbrojtjes së të drejtave kushtetuese të shtetasve dhe moralit qytetar që ka ngritur peshë shoqërinë: mbroni të drejtat e shtetasve përballë pushtetit të shtetit. Refuzoni masat e arrestit dhe lironi në sallë protestuesit.
Drejtuesve të policisë dhe efektivëve që kanë ushtruar dhunë i garantohet që do të paguajnë ashpër sipas ligjit militantizmin politik agresiv që kanë treguar.
