Avokati i Popullit/ Belind Këlliçi: Procesi farsë! Institucioni synohet të merret nga PS

Ka nisur me tensione seanca e sotme plenare në Kuvend, aty ku pritet të votohet për avokatin e popullit, në postin e të cilit janë gjashtë kandidatë.
Deputeti demokrat, Belind Këlliçi e ka cilësuar procesin si farsë, ndërsa ka ngritur akuza se institucioni sipas tij synon të merret nga PS-ja.
“E kemi bërë të ditur me shkrim qëndrimin tonë mbi këtë proces. Jeni njoftuar për tërheqjen e të gjitha firmave për të gjitha kandidaturat që kanë paraqitur për të garuar për pozicionin e avokatit të popullit. Është edhe lepuri i Surrelit, që po çon deri në fund skenarin e kësaj maxhorance të paralajmëruar javë më parë se Avokatin e Popullit do e merrte PS, e kanë thënë socialistët. Qëndrimi ynë është i prerë, asnjë nga 26 kandidaturat nuk i ka firmat e deputetëve të PD. PD nuk merr pjesën ë këtë farsë sa kohë nuk tërhiqni emrin e Endri Shabanit. Kandidaturat tona janë Adriana Kalaja dhe Besim Ndregjoni”,- është shprehur Këlliçi.
Në garë për Avokatin e Popullit janë gjashtë kandidatë, Ardiana Kalaja, Aranita Brahaj, Besim Ndregjoni, Endri Shabani, Skënder Haluca dhe Tartar Bazaj. Mes emrave të dërguar në Parlament për momentin më i kuotuar është Endri Shabani, për të cilin thuhet se ka mbështetjen e së majtës.