Atdheu Real është një tjetër, ndërsa Atdheu Legal është ky që ofron KQZ me vendimin e fundit, e diktuar nga ligji i ri i shpirtvogëlsisë dhe egoizmit të partive politike.
Në çdo vend normal dhe të europianizuar, partitë politike kryejnë përmirësimin e ligjit zgjedhor për të realizuar përputhjen sa më të mirë të Atdheut Real me Atdheun Legal.
Përndryshe, në Shqipëri, ndryshimet në ligj kryhen për të çimentuar të njëjtët zaptonjës në krye të monopoleve; për të siguruar, riciklimin e të njëjtëve personazhe të partive politike në kupolë.
Siç kuptohet edhe nga tabela e mëposhtme, në një Shqipëri aq të diversifikuar politikisht dhe kulturalisht, me një emigracion masiv, që ka përfshirë 2/3 e popullsisë; me disproporcione të thella në zhvillim mes krahinave, e shkaktuar pikërisht prej politikave të njëanshme zhvillimore dhe mungesës së përfaqesimit; me aq shumë njësi etnografike dhe krahina, komunitete , te cilat, që prej ardhjes së diktatorialeve regjionaliste në pushtet më 2 dhjetor 1945, nuk janë përfaqësuar asnjëherë saktësisht në Parlament; i vetmi kriter që zgjedhin ligjvënësit e dy krahëve politike për të përcaktuar në vitin 2025, shperndarjen e kolegjeve është numri i popullsisë.
Për ato nuk ekziston asnjë kriter tjetër për rishpërndarjen e kolegjeve, mjaft që të kenë të garantuar ekzistencën e fashos së sigurisë dhe të shpresojnë që të futen në këtë strofkull, që i siguron pjesmarrjen në spektaklin e rrahjeve, fyerjeve, flakadanave dhe fishezjarreve në kuvend.
Si mundet që Korçës së dijes dhe kombformimit, vendit ku lindi Kultura e Lartë e Nacionalizmit, t’i hiqet një kolegj zgjedhor, në vend që t’i shtohej një më tepër, për shkak të emigracionit të elitës korçare, që do të duhet të përfaqësohet?!
Si është e mundur që Shkodra të lihet sërish me 11 kolegje, ndërkohë që pritej shtimi i numrit të deputetëve, ristrukturimi i përfaqësisë për Qarkun më të madh të vendit dhe me nevoja përfaqësimi, të rrjedhura nga kombinimi i faktorëve etnografike, gjeografike, kulturore, etj?!
Ndërkohë çudia vazhdon: Fierit, edhe më tutje, do t’i ruhen 15 kolegje, edhe pse do t’i mjaftonin shumë më pak për të kryer misionin e një hapësire të njëtrajtshme dhe homogjene. Çdo lagje në atë qytet, do të ketë edhe në vitet e ardhshme, nga një deputet në Parlament, në të njëjtën kohë që fshatrat i janë boshatisur, sepse kështu sigurohet një masë politike e palëvizshme në balancën përfaqësuese. Vendim politik i Shumicës! Heshtje dhe Memecëri e Opozitës së Hutuar.
Pyetja është: si është e mundur që Opozita është aq miope dhe “nuk kupton” se, vetëm me Fierin, Elbasanin, Durrësin dhe Vlorën, të çimentuara artificialisht në shifra kolegjesh jo reale, të fiksuara në mënyrë të kundërt me logjikën e themelimit të përfaqësive në vendet demokratike, që respektojnë të drejtat e komuniteteve, rezultatet e zgjedhjeve të ardhshme janë të paracaktuara?!
Si mund të ketë një Parlament Përfaqesues Shqipëria, kur ligji elektoral nuk ka të garantuar përfaqësimin e drejtë dhe proporcional të krahinave dhe komponenteve përbërës të Nacionit?!
Hapi i parë që një vend të ketë zgjedhje të lira dhe të ndershme është një ligj i drejtë dhe i saktë mbi shpërndarjen e kolegjeve.
Starti është sërish i njëjti, ai që krijoi zinxhirin e zgjedhjeve të kontestuara, të parlamenteve të çimentuara me të njëjtët personazhe dhe konkurentëve që do të rendin shumë shpejt drejt përplasjeve primitive për akaparime zgjedhësish me çdo mjet dhe mënyrë.
