Nji letër e Prof. SAMI REPISHTIT (SHBA), dërgue Neshat Bilalit,
ku evidenton se
“Në ato ditë të viteve 1945-46, Muharrem Bajraktari shikohej si figura kryesore dhe ma e pastër e rezistencës anti-komuniste në Shqipëri”.
/ Në foto: S. Repishti
Pjesë nga Letra:
Me 2 Kallnor 2003
I dashtuni z. Bilali,
Faleminderit për dhuratën e librit që më keni dërgue që në muejin korrik të vitit të kaluem. Për arsye të gjendjes shëndetsore të keqe, nuk kam qenë në gjendje të ju përgjigjem dhe të ju falenderoj.
Librin “Muharrem Bajraktari në kujtimet e mia”, e kam lexue me interes dhe përfitim. Ka shumë gjana që nuk i kam dijtë, dhe mjaft të tjera që kanë pasë nevojë për sqarim. Ju përgëzoj se keni ba nji shërbim të mirë. Sot dëshiroj të ju njoftoj sa vijon:
Në pranverën e vitit 1946, në Shkodër ka ardhë avokat Abdyl Kokoshi (ma vonë i pushkatuem) dhe ka marrë kontakt me ingj. Fahri Rusin (ma vonë i pushkatuem) tue kërkue të vendoset kontakt me Muharrem Bajraktarin. I ndjeri z. Kokoshi ishte i lidhun ngushtë me “Grupin e Deputetëve” (që u ekzekutuen me 1947) dhe ishte i informuem për mbledhjen e gushtit 1945 në katundin Çam. Unë nuk e kam takue z. Kokoshin, por shokët e mij më treguen se grupi i deputetve mendonte me paraqitë Muharrem Bajraktarin si krahu ushtarak i lëvizjes kundërshtare që organizohej në Tiranë.
Ingj. Fahri Rusi, kryetar i grupit tonë të të rinjve anti-komunistë shkodranë, kërkoi nga unë që të hetojshe mundësitë e nji lidhjeje me Bajraktarin. Unë kam njohë nji rojtar pyjesh nga Dugagjini, me mbiemnin Kola (emnin e parë e kam harrue), dhe ai premtoi se do të merret kontakt me të arratisun në zonën e Pukës e mandej me anë të tyne me Bajraktarin. Fatkeqësisht, Kokoshi u arrestue, grupi u dënue dhe u ekzekutue. Ma vonë morëm vesh se edhe Bajraktari ishte largue për ne Greqi. Në tetor 1946 unë u arrestova, bashkë me nji grup shokësh, dhe kështu mbaroi në disfatë përpjekja e jonë me zgjanue lëvizjen anti-pushtet në të gjithë Shqipërinë.
………………………………………………………………
Ju shkruej për këtë episod të vogël me qenë se ju jeni të interesuem aq shumë për personalitetin e Muharrem Bajraktarit, i cili në ato ditë të viteve 1945-46 shikohej si figura kryesore dhe ma e pastër e rezistencës anti-komuniste në Shqipëri.
Ju uroj shëndet e çdo të mirë,
Sinqerisht i jueji
Sami Repishti
PS. Po ju dërgoj nji studim mbi Çamërinë. SR
Publikuar nga Petrit Palushi
