Nga Enver Robelli
Në zgjedhjet parlamentare në Austri më së shumti vota ka fituar partia e ekstremit të djathtë, e njohur me tri shkronja: FPÖ. Kjo parti mban lidhje të ngushta me partitë e Putinit, Vuçiqit dhe Dodikut. Këta dy të fundit janë propagandistë të rrezikshëm serbë. Putini dyshohet për krime të luftës. Ata dy të tjerët kanë dëshmuar afërsi ndaj të dënuarve për krime të luftës.
FPÖ dështoi në përpjekjen për krijimin e qeverisë për shkak se e refuzoi presidenti austriak Alexander van der Bellen. Në një paraqitje para mediave ai tha se konservatorët (ÖVP) dhe socialdemokratët (SPÖ) i kanë treguar arsyet pse janë kundër një koalicioni me FPÖ.
Konservatorët dhe socialdemokratët janë të shqetësuar për demokracinë liberale, sundimin e ligjit dhe ndarjen e pushteteve nëse në qeveri merr pjesë FPÖ.
Këto parti, të cilat e kanë drejtuar Austrinë pas Luftës së Dytë Botërore, theksuan se radikalëve të FPÖ-së u mungon një qëndrim proeuropian, andaj, kësisoj, dëmtohet edhe Austria.
Një problem tjetër: politika ndaj Rusisë dhe afërsia me Putinin e FPÖ-së. Nëse në pushtet do të vinte FPÖ, atëherë shërbimet e huaja të inteligjencës do të kufizonin ndjeshëm bashkëpunimin me Austrinë. A ka arsye të tjera pse FPÖ nuk duhet të drejtojë qeverinë? Po. Gjuha përçarëse e polarizuese. Koncepti i prapembetur për gratë. Mungesa e distancimit nga ekstremizmi i djathtë.
Presidenti Alexander van der Bellen tha se pas konsultimeve me partinë konservatore ÖVP dhe atë socialdemokrate SPÖ, nuk mund ta mandatojë kandidatin e FPÖ-së për kancelar të Austrisë.
