Nga Xhevat MUSTAFA
Sajesa e re e kryeministrit Edi Rama në intervistën e tij në gazetën amerikane “New York Times” për krijimin e një “Vatikani apo shteti bektashi” në mes të Tiranës është shprehje apo një dëshmi e re se një “i çmendur” ka gjet në këtë vend shumë të tjerë e të tjera si vetja apo ka gjetur shesh!? Prandaj ka 11 vjet që bën përshesh… , jo për
shqiptarë, por për “vëllezërit e Enverit” dhe miqtë e tij rreth nesh!? Shpresoj që bektashinjtë shqiptarë, që ndjehen më shumë SHQIPTARË se sa bektashinj, të mos e pranojnë këtë marri të rradhës të Edi Ramës, që të kujton ato “të ëmës së Zeqos në majë të thanës”! Kompleksi që kanë bektashinjtë në Tiranë është i bollshëm dhe i denjë për ata si ambient e për nga favorizimet dhe kompetencat…! Por, edhe të marrin me mend se pas kësaj edhe katolikëve, ortodoksëve, myslimanëve, arumunëve, goranëve, serbëve, maqedonasve, malazezëve, boshnjakëve…mund t’u lindë dëshira të kenë edhe ata shtetet e tyre në mikro shtetin shqiptar, që është afro 11 herë më i vogël se ai i Italisë, me 302.073 km katrorë apo rreth 19 herë më i vogël se ai i Francës me 551.695 km katrorë!? Është e pamundur që kjo aventurë apo ky copëtim i ri i Shqipërisë të mos të të kujtojë dhe lidhet me copat e tjera të falura sipas kokës, tekave dhe vendimeve të kryeministrit! Fjala është për “shitjen” apo dhurimin e Sazanit Jared Kushnerit, dhëndër i Trump dhe bizmesmen amerikan; të Gjadrit kryeministres italiane Meloni e në perspektivë edhe shteteve të tjera…! Padyshim, kjo ide jo origjinale e tij, është një marrëzi e re e një kryeministri të papërgjegjshëm, që për kolltukun e xhepat e vet copëton dhe sakrifikon Shqipërinë!? Sipas meje, skenari i Edi Ramës i kapërcen interesat elektorale për të rrëmbyer me këtë akt antishqiptar votat e bektashinjve. Pra, nuk synon të cenojë as Ilir Metën dhe Sali Berishën! Mbi të gjitha ky skenar cenon interesat e Shqipërisë, duke krijuar brenda saj një shtet islamik e duke e trembur botën e krishterë me dy “gogolë islamikë” shqiptarë!
Natyrshëm mund të shtrohen pyetjet: more ky Edi Rama është kryeministër i zgjedhur dhe i shkarkueshëm apo faraon, perandor, sulltan, mbret, car, krajl…? Është shqiptar apo globalist…? A është vërtetë shqiptare apo internacionaliste, gjallë apo “e varrosur për së gjalli”, Partia Socialiste, që ai bën ç’ti teket me kokën e vet problematike? Po Shqipëria a mos është shndërruar në “epokën Edi Rama” një “varrezë për të gjallë” ose “një çmendinë për të mençur”???!!!
