Është 15 vetë numri i përkohshëm i besimtarëve vrarë gjatë sulmit të sotëm terrorist kundër bashkësisë katolike të fshatit Essakane, në Burkina Faso, ndërsa kremtohej Mesha. Lajmi u bë i ditur përmes një komunikate të Ipeshkvit të dioqezës së Dorit, Imzot Laurent Bifuré Dabire.
Nga viktimat, 12 mbetën të vdekur në vend; tre, si pasojë e plagëve të marra. Flitet edhe për dy të plagosur. Sipas burimeve të shtypit, sulmi u krye nga persona të armatosur brenda kishës katolike të Essakane.
“Në këto rrethana të dhimbshme”, shkruan prelati, “ju ftojmë t’i kërkojmë Zotit pushimin e pasosur për ata që vdiqën duke u lutur, shërimin e të plagosurve dhe ngushëllimin e zemrave të pikëlluara.
Lutemi edhe për kthimin në fe të atyre, që vazhdojnë të mbjellin vdekje e shkretim në vendin tonë. Uroj që përpjekjet tona të pendesës dhe të lutjes gjatë kohës së Kreshmëve, të sjellin paqe dhe siguri në vendin tonë, Burkina Faso”.
Nga Vatican News
