Edison Ypi/ I am from Kalaja e Dodës

-Nga je ?
-I am from Kalaja e Dodës.
-Çfarë di për Kalanë e Dodës ?
-Kalaja e Dodës, është një parajsë natyrore me njerëz energjikë, tejet punëtorë, dhe dramatikisht të varfër. Me ajër të pastër, dimër të ashpër, gjysmën e vitit mbuluar nga dëbora, ujra rrjedhës, pyje dhe kullota të bukura si nëpër ëndërra. Babai im bashkë me të tjerë from Kalaja e Dodës, para se të vinin të ndërtonin këto vilat në Tiranë, kanë tërhequr njëri-tjetrin në Angli.
-Pse në Angli ?
-Sepse në Angli po të punosh shumë fiton shumë. Anglezët kanë paret, u duhet puna. Ne kemi punën, na duhen paret. Kjo vila ime që po sheh këtu e dëshmon çka po të them.
-Çfarë di për Anglinë ti tjetri from Kalaja e Dodës ?
-Anglia është Mbretëri, është vend i pasur. Ajo që mua më mahnit është se Anglia nuk ka Kushtetutë. Që domethënë se anglezët e bëjnë sot Drejtësinë si e kemi bërë ne para disa shekujsh, me Kanun.
-Po ti tjetri nga je ?
-I am from Zall Dardha. Edhe ne from Zall Dardha kemi ndërtuar vila. Ja, ajo atje me tre kate. Dy vëllezërit e mi që punojnë në Londër më kanë thënë se një vilë të tillë anglezi mund ta ndërtojë me djersën e tre brezave, ose kurrë. Dembelat dhe parazitat pëshpërisin se ne from Zall Dardha sjellim nga kurbeti vetëm pare, asgjë tjetër. Në fakt, dibrani sjell nga Anglia gjithçka që Anglia ka.
-A mund ta plotësosh ti tjetri këtë from Zall Dardha lidhur me atë se çfarë sjell Dibra nga Anglia ?
-I am from Maqellara. Unë që kam një xhajë në Mançester dhe një baxhanak në Liverpul e di mirë se Dibrani sjell nga Anglia jo vetëm Sterlinën, por edhe seriozitetin, edukatën, dashurinë për punën, rregullin, respektin, disiplinën, shkurt qytetërimin.
-Ti tjetri, a di ti për Anglinë ndonjë gjë më tepër se ky from Maqellara ?
-I am from Cereneci. Anglia është nona dhe baba e qytetërimit. Anglia është ajo që e rrotullon politikën e botës. Kaq di unë për Anglinë. Po deshe të dish më tepër pyet këtë tjetrin.
-I am from Muhrri. Në Angli kam dy djem daje. Anglia është ishull. Ka qënë Perandori. Kalaja e Dodës e Shqipërisë ngjason me Kalanë e Dosës së Anglisë, që është Skocia. Këto dy Kala Dode janë të largëta por kanë ngjajshmërira antropometrike dhe fjalë të përbashkëta. Ku ka zë s’është pa gjë.
-Po ti kuqsi me quka në turi a di ndonjë gjë për Anglinë ?
-I am from Ostreni. Vet nuk kam qënë. Kam një djalë xhaje në Londër. Të gjitha shpikjet e botës i ka bërë anglezi. Në Angli makinat e kanë timonin nga e djathta. “I am from Ostreni” ma ka mësuar xhaja.
-Ti që gjithë kohën qesh duke dëgjuar miqtë e tu, prezantohu dhe thuaj çfarë di për anglezët dhe Anglinë.
-I am from Zerqani. Unë di Anglisht. Unë e di çfarë domethënë “I love You”. Në kohën e Diktaturës ne from Zerqani kemi spiunu ata që kalonin këtej për me u arratis. Këtë mëkat kaq të flliqt që s’e lan dot as Drini, s’di ai do ta lajmë ne from Dibra.
-Ti veshllapush, a do me shtu diçka ?
-I am from Bulqiza. Këtu në këtë lagje luksoze të Tiranës me emrin e bukur Little England, qarkullojnë fjalë të liga sikur ne from Kalaja e Dodës kemi nga tra gra: një në Tiranë, një në Londër, një në Birmingham. Është rrenë. E refuzoj me neveri. Kunati im në Angli punon dhjetë orë në ditë. Më ka thënë se pronari i tij 58 vjeç shkon ende në shkollë ku mëson gjuhën spanjolle dhe pianon. Kur e pyet, thotë: Nuk dua të vdes i paditur. Do mësoj sa të jem gjallë.
Këtu mbaroi biseda me dibranët tigra dhe luana që mezi i mblodha.
Ku ndodhet Little England ?
Më interesante se çdo muze’ me mbretër dhe perandorë. Më magjepsëse se çdo ekspozitë me piktura dhe gravura. Më sugjestive se çdo Aulë universitare ku një profesor me mjekërr flet për zanafillën e Universit dhe Brimat e Zeza. Mbi Lumin e Tiranës. Ngjitu mbi kodër. Aty është Kalaja e Dodës.