Hansi Flick është shkarkuar nga detyra e trajnerit të kombëtares gjermane të futbollit pas një takimi me drejtuesit e federatës.
Ky vendim u mor vetëm nëntë muaj para Euro 2024.
Shkarkimi i tij u komunikua dje pas humbjes 4-1 në miqësoren ndaj Japonisë.
Në një deklaratë të lëshuar nga federata e futbollit në Gjermani, u konfirmua se pas një ‘takimi të drejtuesve’, Flick u shkarkua.
Presidenti i Federatës Gjermane të Futbollit, Bernd Neuendorf tha: “Komisionet ranë dakord që Kombëtarja A për meshkuj ka nevojë për një shtysë të re pas rezultateve zhgënjyese të fundit. Ne kemi nevojë për një frymë optimizmi dhe besimi në vendin tonë. Për mua personalisht, është një nga vendimet më të vështira të kohës sime në detyrë deri tani. Sepse e vlerësoj Hansi Flick dhe ndihmës trajnerët e tij si ekspertë dhe njerëz të futbollit. Por suksesi sportiv është prioriteti kryesor për DFB. Kështu që vendimi ishte i pashmangshëm”.
