Kandidati i koalicionit Bashkë Fitojmë për Bashkinë e Kukësit, Admir Sinamati ka vijuar të denoncojë shkeljet ligjore nga ana e kandidatit të PS-së para dhe gjatë fushatës elektorale, si dhe në ditën e votimit dhe numërimit të votave.
Sinamati ka renditur një sërë shkeljesh, ku sipas tij ky fenomen ka vetëm një emër, deformim kriminal të vullnetit të qytetarëve të Kukësit gjatë 14 majit.
Kandidati i koalicionit ‘Bashkë Fitojmë’ për Kukësin, i ka ndarë shkeljet flagrante në tre faza, ku sipas tij dominojnë punësimet elektorale, presionet mbi administratën publike, tenderat abuzive gjatë fushatës, si dhe shkeljet e gjetura nga KLSH për firmën e Safet Gjicit në kompaninë që ia kishte transferuar të vëllait, duke përfiturar tender 10 milionë euro nga Ujësjellësi Tiranë, para të cilat dyshohet se janë përdorur për të blerë vota në Kukës.
Sinamati: “Jemi sot në vazhdën e denoncimeve që ka bërë PD për farsën elektorale të 14 majit për të dëshmuar me fakte prova dhe gjithçka rreht deformimit kriminal të zgjedhjeve të 14 majit në Bashkinë e Kukësit. Ne i kemi quajtur shkelje ligjore gjatë fushatës elektorale, por ky fenomen ka vetëm një emër, deformim kriminal të vullnetit të qytetarëve të Kukësit gjatë 14 majit.
Të flasësh për shkeljet ligjore gjatë fushatës elektorale si dhe procesit të votimit të 14 majit, do të duhen po aq ditë, po aq orë, po aq minuta sa edhe ka ndodhur fushata elektorale, sa edhe kanë ndodhur këto shkelje, pasi çdo ditë, çdo orë, çdo minutë, në Qarkun e Kukësit, në Bashkinë e Kukësit, qeveria e njësuar me PS me kandidatin e saj dhe kandidatët për Këshillat Bashkiak kanë ushtruar paligjshmëri nga sekonda e parë deri në sekondën e fundit të mbylljes së procesit të votimit në Kukës.
Të flasësh për fenomenin e votës dhe procesit elektoral në Kukës, duhet të gjesh në fjalor dhe në arshivat më të errëta të politikbërjes, fenomene të ngjashme gjë e cila nuk ndodh as në vendet me demokraci minimale, e njësuar plotësisht me regjimet putiniste, erdoganiste dhe vuçiste.
Në Kukës shkeljet kanë qënë flagrante, duke i ndarë në tre faza. Faza gjatë procesit parazgjedhur, në fazën e fushatës elektorale 30 ditëshe dhe procesit të votimit dhe numërimit të votave. Procesi diskriminues, i dhunës, lancimit të popullatës së Qarkut të Kukësit ka qënë flagrant.
Mjafton të marim disa statistika për emigracionin e freskët, ku pas zgjedhjeve të prillit 2021, vetëm nga njerëzit strukturat e PD janë evidentuar një emigracion masiv për Kukësin, ku janë më shumë se 3400 qytetarë me të drejtë vote dhe potencialisht votues të PD që janë larguar nga Shqipëria drejt BE-së për shkak të mungesës së shpresës dhe një mekanizmi të ndërtuar me regji direkte politike.
Punësimet selektive gjatë vitit të fundit, spastrimin e elementëve kundërshtarë, njerëz të identifikuar si jo votues të rilindjes dhe zëvendësimi me mercenarë të PS ka kryer një efekt negativ në klimën e përgjithshme por edhe në rezultatin e 14 majit.
Janë bërë punësime elektorale afër datës së votimit si dhe gjatë muajit të fushatës.
Presionet e drejtëpërdrejta te punonjësit e administratës për të mos mbështetur hapur kandidatin e koalicionit opozitar ‘Bashkë Fitojmë’, si formë direkte tutele ka ndikuar në mënyrë negative në rezultatin e zgjedhjeve.
Pasaportizimi dhe dhënia e lejes së banimit me kontrata false abuzive, ku nga ana jonë janë evidentuar të paktën 753 votues nuk janë njohur në fshatra ku kanë votuar nga komisionerët e PD-së, pra të ardhur në mënyrë abuzive nga përgjegjësit e zyrave të gjendjes civile në Kukës.
Përdorimi për arsye elektorale për dhënien e shtetësisë nga Kosova, ku vetëm 530 qytetarë nga Kosova kanë marrë shtetësi vitin e fundit dhe të gjithë janë bërë pjesë e listës votuese në 14 majit. Të gjithë qytetarët e kanë marrë pasaportën shqiptare nga dora e ish-kryetarit të bashkisë nga PS-ja.
Është përdorur në mënyrë abuzive autoriteti i ambasadorit shqiptar në Kosovë si dhe disa zyrtarë të rëndësishëm vendorë të Kosovës siç është një nga drejtuesit e Policisë së Kosovës dhe një drejtuesi i institucioneve shëndetësore të Kosovës për të cilët ne kemi marrë denoncime dhe do të bëjmë të qartë rolin e tyre në ndikimin e qytetarëve kosovarë që kanë votuar në 14 maj.
Përdorimi dhe përfshirja në listën e personave të listuar si fitues të titullit ‘Qytetar Nderi’ nga ish-kryetari i bashkisë Kukës, të personave miq të tij dhe përdorimi abuziv i tyre gjatë fushatës elektorale ka dhënë një efekt dhe ndikimi negativ në tjetërsimin e vullnetit të qytetarëve me dyshtetësi.
Detyrimi i të gjithë punonjësve të administratës për tu anëtarësuar në platformën identifikuese të Aktivistit, ka qënë një tjetër formë e rëndë e shkeljes së lirisë të të punësuarve në administatën publike duke u bërë njësh me kandidatin e PS.
Abuzimi me tenderat gjatë fazës paraelektorale, janë bërë një sërë shkeljesh dhe abuzimesh duke u nisur nga një zë deformues kriminal, ku mjafton të përmendim se në fushatës elektorale është inauguruar fillimi i punimeve në rrugën e Kalimashit një investim i drejtpërdrejtë nga Bashkia Kukës dhe tenderimi abuziv.
Gjetjet e KLSH-së për firmën e Gjicit që ishte kaluar në pronësi të vëllait të vetë e cilësuar si një marrëveshje e ndaluar për një tender me Ujësjellësin e Tiranës me një vlerë 10 mln euro në shkelje direkte, para të cilat ne dyshojmë se janë përdorur për zgjedhjet në Kukës.”
