Qeveria italiane pritet të shpallë gjendjen e jashtëzakonshme si pasojë e motit ekstrem dhe humbjen e 6 jetëve.
Në një ditë të vetme, në Siçili, Kalabri e Sardenjë vdiqën 5 persona, një punëtor i angazhuar në operacionet e shuarjes së zjarrit dhe katër të moshuar.
Nga zjarret ka pasur edhe shumë të plagosur.
Në Palermo, dy punonjës të pylltarisë, gjithashtu duke luftuar me shuarjen e flakëve dhe në fund të turneve rraskapitëse, përfunduan në terapi intensive.
77-vjeçari Salvatore Cometa dhe partnerja e tij 75-vjeçare Teresa Monastero u bllokuan në shtëpinë e tyre të pushimit në Cinisi në zonën e Palermos.
Kur zjarri shpërtheu në mes të natës në malet shumë afër me aeroportin Falcone-Borsellino, ata nuk patën kohë për të shpëtuar.
Gjatë operacioneve për pastrimin e zonës së shkatërruar nga zjarri: dy të moshuarit u gjetën pranë njëri-tjetrit, si të dorëzuar për faktin se nuk kishin më shpresë.
Edhe ditën e djeshme për shkak të stuhive ndërroi jetë një 16-vjeçare në Milano.
Ajo ishte duke fjetur gjumë në një kamping dhe vdiq pasi i ra një pemë mbi kokë.
