Deklarata e plotë:
Qeveria po bën gjithçka që të mbjellë kudo krizën e saj agresive e korruptive.
Një krizë e thellë e pashembullt ka zënë rrënjë edhe në themel të institucioneve tona arsimore.
Prej disa javësh pedagogët protestojnë: -për autonomi universitare,
-për liri akademike,
-për mbështetje të kërkimit shkencor.
Pedagogët kërkojnë nga qeveria që të ketë vëmendje, seriozitet, angazhim për botën universitare, e posaçërisht për stafet akademike, ndihmësakademike e administrative.
Faktet na thonë se qeveria po e shpërndan krizën e vet edhe në universitet.
Pedagogët protestojnë-kreu i qeverisë u thotë se do t’u bëjë vetting e do t’u kontrollojë pasurinë.
Protesta vazhdon-kreu i qeverisë u bën presion stafeve të universiteteve rajonale, të cilat thotë se do t’i kthejë në filiale në rastin më të mirë, e po i kërcënon se do t’u vërë edhe kyçin meqë po mbështesin protestën.
Protesta vazhdon, e mbështetet nga studentët-kreu i qeverisë sajon situata surreale, ku ai do t’i mbajë tre vjet në sirtarin e tij diplomat e studentëve të mjekësisë.
Kjo nuk do të thotë të mbash të diplomuarit këtu. Kështu, nuk do jetë larg dita kur ashtu edhe siç po ndodh në këto vite në fakultete të tjera – edhe në Fakultetin e Mjekësisë të mos regjistrohen më studentë.
Por mesa duket ky nuk është shqetësimi i kreut të qeverisë që i ka duart e zëna në instalacionin prej druri në shifrën marramendëse 4.4 milion euro oborrin e kryeministrisë, dhe këmbët nuk i zënë dhe, duke fluturuar 127 herë me charter me shifrën marramendëse 19 milionë euro.
Ndaj nuk ulet të dëgjojë e të kuptojë pedagogët.
Të kuptojë që mbështetja për kërkim shkencor është domosdoshmëri, (edhe sikur të mbaje parasysh rekomandimet e BE për arsimin) të dëgjonte se p.sh. për të marrë pjesë në një konferencë pedagogu duhet të mbështesë veten në fazën kërkimore dhe të përgatitjes së punimit si dhe për taksën e veprimtarisë edhe për udhëtimin e akomodimin, po kështu edhe për të botuar në revista të indeksuara, si dhe për krijuar bibliotekën profesionale që është mjeti i parë i punës së çdo pedagogu.
Sikur stafet universitare të mbështeteshin për këto domosdoshmëri, sigurisht, që kontributi i tij nuk do të shkonte në këtë eksod të akademik e studentor, që s`ka paralele në histori, as në mbylljen e shumë degëve të studimeve universitare në Shkodër, Elbasan, Vlorë, Gjirokastër, Korçë etj. mes të cilave degët e albanologjisë, që përkufizojnë identitetin tonë kombëtar, për të cilat prej vitesh nuk ka kurrfarë interesimi.
Padyshim nuk do të vinim as në thellimin e krizës ekonomike e rritjen e kostove të përballimit të studimeve, nga ana e studentëve – (të cilët në Kosovë po subvencionohen me nga 100 euro secili dhe në Europë 2-5 herë më shumë), as në nëpërkëmbjen e figurës së pedagogut nga ministria e arsimit e cila po të kryente detyrën e të zbatonte ligjin e indeksimit të pagave, rritja do të ishte disa herë më shumë se shifra qesharake, as në rënien e shpejtë të numrit të studentëve që regjistrohen në vit të parë në degët e shpallura prioritare, por në një dialog të hapur e produktiv në përmbushje të të gjitha kërkesave të stafeve universitare, të cilat janë minimale dhe terësisht të realizueshme
Partia Demokratike mbështet Lëvizjen universitare që synon: rritjen e cilësisë së mësimdhënies,
që shkon drejtpërdrejt në dobi të studentëve e njëherësh reformimin e modernizimin e jetës së brendshme të universiteteve,
hartimin e zbatimin e strategjive politike, ekonomike, sociale e të tjerave aspekteve fundamentale në jetën e vendit të cilat janë bllokuar qysh ne vitin 2015 me miratimin e Ligjit 80 i cili – siç PD është shprehur prej vitesh- centralizon dhe burokratizon funksionimin e institucioneve të arsimit të lartë.
Një universitet në krizë është tregues i drejtpërdrejtë dhe padiskutueshëm i një shteti në krizë. Pasojat e kësaj gjendjeje do të jenë jashtëzakonisht të shpejta dhe të rënda.
Prandaj kërkohet me ngulm, edhe një herë e në mënyrë të përsëritur: ktheni vëmendjen nga universitetet, nga elita e shoqërisë!
