Datë në historinë detare
Në 4 tetor 1940, në një distancë prej rreth 60 milje në lindje të Barit, piroskafi SS “Antonietta Costa”, gjatë lundrimit në konvoj për në Durrës, në orën 03:30 zvarritet mbi një mjet të fortë të nënujshëm dhe pas pak dëgjohet një shpërthim i fortë që tronditi gjithë konvojin. Nga kontrolli u vërejt një çarje në hambarin nr.5, të cilin ekuipazhi e mbylli përkohësisht duke vazhduar udhëtimin drejt Durrësit. Pas një kontrolli të nënujshëm në Durrës, u vërejtën katër gërvishje të mëdha (shirita paralel) në bord të majtë. Sipas informacineve anija ishte përplasur me nëndetësen britanike “Rainbow” (N-16), e cila gjatë manovrimit për të goditur me silurë, ishte afruar aq shumë, sa që çoi në përlasje dhe në mbytjen e nëndetëses, ku humbën jetën gjithë ekuipazhi prej 56 vetash.
Dhe reagimi britanik ishte i menjëhershëm; në 9 tetor SS “Antonietta Costa” bashkë me velierën V-36 “Maria Grazia”, të shoqëruar nga kryqëzori italian “Ramb III” u nisën nga Durrësi për në Bari. Të ndjekur nga nëndetësja britanike “Regent” (N-41), në orën 05:37, piroskafi dhe veliera u goditën me silurë në distancën rreth 21 milje nga Durrësi. Nga shpërthimi, veliera u mbyt (personeli u imbarkua tek “Ramb III”), kurse SS u dëmtua rëndë, një marinar vdiq dhe tre u plagosën, ndërkohë edhe nëndetësja u largua nga vend ngjarja e dëmtuar. Edhe nëndetësja britanike “Regent” (N-41) do të mbytjej me të gjithe ekuipazhin më 18 prill 1943.
Pas aksidentit, u mendua se anija mund të shpëtohej duke u tërhequr nga rimorkiarori italian “Vetiska Sant’ Andrea” drejt Durrësit. Ekuipazhi u evakua tek“ Ramb III”, me përjashtim të disa personave që qëndruan në bord, për ndihmë gjatë tërheqies së anijes. Por ajo nuk mundi ta arrinte Durrësin. Prej sasisë së ujit që futej, në datën 9 tetor, në orën 10:45, anija u mbyt 1-milje në perëndim të portit tëDurrësit, në thellësinë 14 m, pranë cekinës së Talbotit.
SS “Antonietta Costa” ishte anije për transport mallrash ndërtuar në vitin 1910, në Genova Itali, me kapacitet bartës 5,900 t, përmasa 136.6×16.6×8.47m dhe shpejtësi 11 milje/orë. Gjatë aktivitetit të saj lundrimor, për kuriozitet kjo anije në janar 1917 është për plasur me një anije angleze në Capo Verde, Afrikë; në dhjetor 1917 është dëmtuar pas goditjes me silurë nga ND “UB-49”, ndërsa në dhjetor 1920, gjatë lundrimit ka bërë aksident duke u përplasur me një anije australiane, ku në të gjitha rastet është riparuar, duke arritur në ngjarjen fatale të datës 9 tetor 1940.
PS. Ky material u përgatit me ndihmën e kapiten Neki Lameborshi dhe zhytës Igli Pustina.
