Nga libri “Çuditë e Amerikës”, shqipëruar nga Shefqet Meko
NJË TJETËR RRËFENJËZ NGA “ÇUDITË E AMERIKËS”
NGA PIKTURA TEK SHPIKJA E KODIT
Sam ishte artist, një nga artistët më të mirë që ka nxjerrë Amerika. Por nuk është kjo arsyeja që busti i tij është ngritur në Parkun Qendror të Nju Jorkut. Diçka tjetër.
Sam ishte duke punuar me portretin e Marques Lafayette, kur ai mori një letër. Ishte një moment tronditës. Megjithëse nuk e besonte, letra i sillte një lajm të hidhur.Në atë moment ai ndërpreu punën, portretin që ishte angazhuar e po atë moment, i ktheu shpinën edhe profesionit të tij. Ai nuk ishte mekanik ose shkencëtar dhe, le ta përsëris dhe freskoj kujtesën tuaj, Sam Morse ishte piktor i madh në gjininë e portreteve. Prej këtij momenti iu kushtua faktit se si të bënte të mundur që elektriciteti “të fliste”. Ai nisi kërkimin dhe shpiku sistemin e komunikimit përmes pikave dhe vizave lidhëse që ne e njohim me emrin: Kodi Morse.
Pse?
Për të kuptuar këtë ju duhet të dini se çfarë ishte shkruar në letrën që ai mori më 1832.
Ishte një mesazh që erdhi përmes kuajve dhe karrocave të shërbimit postar amerikan të asaj kohe. Letrës iu desh 7 ditë për të mbërritur tek ai. Në letër njoftohej thjesht se gruaja e tij kishte vdekur. Sam Morse ishte mbushur me dëshpërimin e burrit që humbi gruan e dashur, por edhe me ndjenjën njerëzore se nëse ai do të ishte atje, pranë gruas së tij ndërsa jepte shpirt, mbase mund te ishte ndryshe… Së paku, nëse ai do të ishte njoftuar me kohë se ajo ishte e sëmurë, ai do të mund të ishte atje përpara se ajo të vdiste. Ndaj, Sam Morse iu dedikua një kërkimi në komunikimin masiv, që asnjë burrë tjetër në botë të mos mësonte vdekjen e gruas së vet 7 ditë më vonë, sikurse e mësoi ai. Është ky moment në jetën e secilit, ku njeriu ka nevojë më shumë se kurrë për dikë.
Kjo statujë në park është për njeriun që shpiku telegrafin: Sam Morse. Por dantella më e madhe që mbulon të gjitha fijet e telat e këtij kërkimi shpikës, që tash është në shërbim të njerëzimit, ishte momenti solemn për gruan që ai dashuronte: Zonjën Sam Morse.
Ajo vdiq e vetme, por nje code ishte krijuar.
