Zyra e Brendshme përmbys deportimin e azilkërkuesve shqiptarë.
Letra minon pretendimin e Priti Patelit se shqiptarët që mbërrijnë me pretendime ‘të rreme’ mund të hiqen shpejt.
Zyra për Punët e Brendshme në Britani ka pranuar se nuk ka të drejtë të përshpejtojë dëbimin e azilkërkuesve shqiptarë pas mbërritjes së tyre në Britaninë e Madhe, një ndryshim ky i papritur në politikën britanike për emigrantët, kështu shkruan “The Guardian”
Departamenti ligjor i qeverisë ka konfirmuar se skema nuk do të zbatohet për shqiptarët që aplikojnë për azil në Mbretërinë e Bashkuar.
Pas nënshkrimit të një marrëveshjeje kthimi me qeverinë shqiptare, Patel tha: “Këta shtetas shqiptarë janë sjellë këtu ilegalisht nga rrjetet e organizuara kriminale që udhëtojnë nëpër vende të shumta të BE-së. Ata janë duke blerë azil, duke bërë përpjekje për të kërkuar azil në MB me shpresën se mund të qëndrojnë këtu.”
Avokatët e organizatave për refugjatët “Care4Calais” përmes një letre ligjore të dërguar Home Ofice konfirmuan se shumica dërrmuese e shqiptarëve që kërkojnë leje për të qëndruar në Mbretërinë e Bashkuar nuk do të preken nga marrëveshja.
Clare Moseley, themeluesja e Care4Calais, tha se qeveria britanike donte t’u mohonte shqiptarëve të drejtën për gjykim të drejtë për kërkesat për azil të bëra në Mbretërinë e Bashkuar.
“Sugjerimi ishte se kërkesat për azil të bëra nga shqiptarët janë të rreme. Në fakt, shifrat e fundit tregojnë se 53% e kërkesave shqiptare për azil pranohen nga Ministria e Brendshme, duke treguar se për shumë shqiptarë vendi i tyre nuk është një vend i sigurt për të jetuar. Duke vepruar kështu, ata po pranojnë që njerëzit nga Shqipëria kanë të drejtë të bëjnë një kërkesë për azil. Kjo është një fitore për mirësjelljen njerëzore”, tha Moseley.
Home Office kishte pohuar se njerëzit nga Shqipëria që udhëtonin në Britaninë e Madhe me varka të vogla kishin udhëtuar nëpër vende të shumta për të bërë kërkesa të rreme për azil kur të mbërrinin. Ky pretendim u bë pasi shifrat zbuluan se 2,165 shqiptarë mbërritën në Angli me varka të vogla midis janarit dhe qershorit 2022, krahasuar me vetëm 23 të zbuluara në të njëjtën periudhë të një viti më parë.
