Këtë vit, Time Out – marka e medias dhe mikpritjes, që përpilon guida lokale të disa prej qyteteve më interesante në botë – ka publikuar klasifikimin e dytë të përvitshëm të rrugëve më “cool” (të bukura në botë. Një rrugë e vetme – më shumë se një lagje – mund të përkufizojë kulturën e një qyteti.
“Në pjesën më të madhe të botës, jeta para pandemisë është rikthyer fuqishëm. Njerëzit janë entuziastë të bëjnë projekte dhe të dalin sërish në qytetet e tyre e të shkojnë me pushime” – deklaroi James Manning, përgjegjës i udhëtimeve i Time Out, në një deklaratë.
“Lista jonë e rrugëve më të bukura në botë përfshin arteriet kryesore të cilat ekspertët i këshillojnë t’i vizitoni në këtë moment”.
Renditja e këtij viti përfshin 33 rrugë, tre më shumë se në vitin 2021. Ndër të tjera, përfshin edhe qytete të tjera të reja, si Taipei, Mumbai, Athina dhe Akra.
AMERIKA E VERIUT
Këtë vit, e para në listë është Rue Wellington, në lagjen Verdun të Montrealit.
Redaktorja e Time Out Canada, Laura Osborne, thotë se rruga ka “kokteje fantastike, disa nga paninet më të shijshme në rrugë, madje edhe një plazh urban me rërë”.
Ndër të tjera në vitin 2023 do të bëhet ekskluzivisht rrugë për këmbësorë, gjë që do të shtojë pa dyshim pika të tjera të forta.
“Kjo rrugë kryesore, e njohur si Promenade Wellington, po ndryshon prej vitesh në mënyra origjinale dhe krijuese dhe është me të vërtetë emocionuese të shohësh se si lagjja Verdun vijon të ndriçojë” – tha për CNN Travel, Yves Lalumière, CEO e Tourisme Montreal.
Edhe pse Shtetet e Bashkuara nuk renditen në vend të parë, Amerika mund të rrijë e qetë, duke ditur se ka numrin më të madhe të rrugëve në klasifikim – Calle Ocho në Majami, MacDougal Street në Nju Jork (seli e barit të koktejeve Dante, prej kohësh i pëlqyer) dhe Wentworth Avenue në Çikago janë të gjitha në listë.
Rruga përfaqësuese e Meksikës në listë është Avenida Ámsterdam, në lagjen e modës së Qytetit të Meksikës, në Condesa.
AZIA DHE PAQËSORI
Pesë nga dhjetë rrugët kryesore ndodhen në këtë rajon. Melburni në Australi është në krye të renditjes së vitit 2021 me rrugën Smith Street, por këtë vit ka zbritur në vendin e dytë.
Gertrude Street ka hyrë në listën e Eliza Campbell të Time Out Australia, e cila e ka përshkruar si “të bukur, modeste dhe pa jetën e shfrenuar të natës të rrugëve të tjera relativisht të trazuara”.
Në vend të shtatë renditet Tai Ping Shan, një lagje në ishullin kryesor të Hong-Kongut.
Producentja e CNN, Rhea Mogul, e cila jeton në këtë rrugë, thotë se gjërat më të mira në të janë baret që pranojnë qentë dhe “ndërthurja e së vjetrës me të renë”.
Tai Ping në do të thotë “paqe dhe stabilitet” ndërsa Shan, “kodër”. Një hyrje e rëndësishme në vitin 2022 është Yongkang Street në Taipei, ku ndodhet prodhuesi i birrës së dashur artizanale Zhang Men Brewing.
“Kemi zbatuar strategji të ndryshme për të promovuar këtë zonë te turistët ndërkombëtarë dhe jemi shumë të lumtur që është pjesë e kësaj renditje – deklaroi për CNN, Huang Shih-fang, drejtues i divizionit të çështjeve ndërkombëtare në entin e turizmit në Tajvan – Shpresojmë të kthejmë turistët në zonë pasi të hapet kufiri.”
EUROPA
Time Out me seli në Londër, ka parë nga afër disa prej zgjedhjeve të saj të këtij viti.
Rruga më e bukur e kryeqytetit britanik në vitin 2022 është Deptford High Street, një ndërthurje tezgash në rrugë, tregjesh dhe dyqanesh, baresh e shumë të tjera, që sipas redaktorit të Time Out, Chris Waywell, nuk është vetëm rruga më e bukur në Londër, por edhe me më shumë gjallëri.
Më në veri, Great Western Road në Glasgow është rruga më e rëndësishme në Mbretërinë e Bashkuar, në vend të tretë.
Metropoli i Danimarkës, Kopenhagën, që vitin e kaluar CNN Travel e kurorëzoi “kryeqyteti i ri europian më i bukur”, renditet i pesti.
Rruga Værnedamsve është cilësuar si një “Paris i Vogël” nga redaktorët e Time Out, falë dyqaneve të vogla me verë dhe djathë dhe luleve të freskëta. Kjo duhet ta bëjë të vuajë Parisin, që në të vërtetë, nuk është në listë.
Rrugë të tjera në Europë, të vlerësuara në renditjen e vitit 2022 janë Kolokotroni në Athinë, Calle Echegaray në Madrid dhe Capel Street, në Dublin.
Në lidhje me këtë të fundit, shkrimtari i udhëtimeve nga Dublini, Nicola Brady thotë se Capel “duket një copëz e vërtetë e Dublinit të vjetër”.
Capel Street, e cila është kthyer në një rrugë për këmbësorë në fillim të këtij viti “ka pube që janë aty prej dekadash, pranë restoranteve fantastike koreane dhe vietnameze të cilat janë hapur së fundi”.
RENDITJA E PLOTE
1. Rue Wellington, Montreal
2. Gertrude Street, Melburn
3. Great Western Road, Glasgow
4. Yongkang Street, Taipei
5. Værnedamsvej, Kopenhagën
6. Karangahape Road, Auckland
7. Tai Ping Shan Street, Hong-Kong
8. Yaowarat Road, Bangkok
9. Oranienstrasse, Berlin
10. Hayes Street, San Francisko
11. Avenida Ámsterdam, Qyteti i Meksikës
12. Kolokotroni, Athinë
13. Virgil Avenue, Los Anxhelos
14. Ossington Avenue, Toronto
15. Via Provenza, Medellín
16. Calle Ocho, Majami
17. Deptford High Street, Londër
18. Praça das Flores, Lisbonë
19. Oxford Street, Akra
20. Wentworth Avenue, Çikago
21. Cutting Room Square, Mançester
22. Capel Street, Dublin
23. Jumeirah Beach Road, Dubai
24. Enmore Road, Sidnej
25. Kagurazaka, Tokio
26. Kloof Street, Cape Town
27. Süleyman Seba Caddesi, Stamboll
28. Calle Echegaray, Madrid
29. MacDougal Street, Nju Jork
30. Carrer del Comte Borrell, Barcelonë
31. Newbury Street, Boston
32. Colaba Causeway, Mumbai
33. Everton Road, Singapor
/ CNN
