Mandarina (Citrus reticulata), si shumë agrume të tjera, vendin e origjinës e ka në Azi.
Konkretisht nga Kina dhe Indokina, të cilat mund të konsiderohen si atdheu i lashtë i kësaj peme, i këtyre frutave.
Pse këtë emër, a ka një kuptim ?
Ekziston një hipotezë që lidh ngjyrën e tyre me kostumet që mandarinët përdornin në Kinën e vjetër.
Janë disa varietete mandarinash, por vetëm në vitet 1920-1930 u shfaq varieteti që mbisundon plantacionet sot, Satsuma ose Clementine.
Përdorimi i saj është më i thjeshti i mundshëm dhe s’ka nevojë për shpjegime, por diçka shkurt do prezantojmë:
Në mjekësinë popullore përdoren frutat, lëvozhgat e frutave, gjethet, lulet.
Ajo është e pasur me vitamina A, B, C dhe sheqerna. Nga lëngu i frutave prodhohet mandarinadë shumë e shijshme dhe po aq e tretshme. Mandarinat janë ndër agrumet më të pëlqyeshme falë aromës dhe përmbajtjes më të lartë të sheqerit. Ato janë tretëse, freskuese dhe lëngu i tyre është i pranueshëm edhe nga stomaku i fëmijëve.
Ky lëng i freskët këshillohet për çdo moshë, por posaçërisht i ushqyeshëm për fëmijët, të moshuarit dhe të sëmurët.
Në sajë të përmbajtjes së vitaminave, si dhe të një sasie të konsiderueshme hekuri, mandarinat përbëjnë një ushqim shumë të përshtatshëm për pastrimin e gjakut dhe për luftimin e anemisë.
E ashtuquajtura kura e mandarinave mund të zgjasë gjithë sezonin e tyre që nga vjeshta e parë e deri në fund të dimrit, kur ato mund të jenë ende në pemë.
Ka një tjetër këshillë që mjekimi me mandarina vazhdon 20-25 ditë, duke konsumuar çdo ditë nga 10-15 kokrra ose edhe më shumë, kur frutat janë klasike të vogla.
Lëvozhgat e frutave, gjethet, lulet kanë po ato përdorime si te portokalli. Nëse ato zihen dhe pihen si lëng në formë çaji, kur ky lëng pihet i ngrohtë, bën mirë në rrugët e sipërme të frymëmarrjes, kur ka acarime në grykë apo zënie zëri.
Gjethet dhe filizat e njomë të mandarinës dhe portokallit kanë veti qetësuese në rastet e nevrastenisë, nervozizmit, ankthit apo shpërthime dëshpëruese pa shkak të qartë.
Kujtojmë se mandarina nuk është ilaçi i sëmundjeve të njeriut, ajo ndihmon organizmin të marrë vitamina dhe lëndë minerale, lehtëson gjendjen e organeve të caktuara, por mbetet e domosdoshme dhe duhet të konsumohet pa mëdyshje.
