Ministrja e Shtetit për Marrëdhëniet me Parlamentin, Elisa Spiropali, gjatë mbledhjes së sotme të Komisionit për Sigurinë Kombëtare, replikoi me deputetin demokrat, Flamur Noka, lidhur me sulmet kibernetike të cilat kanë goditur vendin tonë gjatë kohëve të fundit.
Gjatë fjalës së saj, ministrja u shpreh se qëllimi hakerave ka qenë ndërprerja e të dhënave qeveritare dhe shtetërore por nuk ia kanë arritur këtij objektivi.
Spiropali theksoi se Shqipëria në këtë betejë nuk është e vetme dhe se shërbimet nuk janë dëmtuar.
“Me terroristët është e vështirë të diskutosh për përgjegjësi sepse janë aty me një qëllim të caktuar për të dëmtuar shtetin jo mik. Nga analiza që I është bërë që në ditën e parë të sulmit, ka nisur faza e kundërsulmit dhe mbajtjes në këmbë të shërbimeve qeveritare.
Analiza e sulmit nuk është bërë nga ne por nga ekspertët tanë dhe amerikanë. Qëllimi ka qenë ndërprerja e të dhënave qeveritare dhe shtetërore. Kësaj nuk ia kanë arritur. Ne sot kemi në këmbë shërbimet qeveritare. Ne mund të shohim mundësinë e ngritjes së fondeve për këtë çështje.
Shqipëria nuk do jetë e vetme në këtë betejë. Nuk janë dëmtuar shërbimet. Shqipëria shpenzon shumë më pak se vendet e tjera për sigurinë kibernetike edhe për shkak të traditës së munguar dhe faktit që nuk kemi pasur këtë eksperiencë. Sot situate është më ndryshe. Nuk mund të jap këtu emra kompanish sepse nuk është në kompetencën time”, u shpreh Spiropali.
