DITËT
Ditë monotone,
Mbushur me trishtim,
Pa asnjë gëzim.
E megjithatë,
Ndonëse bardhë e zi,
I jetojmë ditët,
Gjithnji,
Si unë, si ti…
LULE TË BARDHA
Lule të bardha si flokë bore
Zbardhin
Marsin
Deri në yllësi,
Por unë s’mundem t’i arrij…
MALL
Mallin për ty
E ndera mbi letër.
Letra s’e mbajti dot.
E shtrydha,
Pikoi lot…
PËRDITË MË VRASIN NGA PAK
Ti më thua,
Vetëm ty të dua,
E m’i puth buzët
Që pikojnë gjak…
Të besoj,
E shtrenjta ime,
Dhe pse jam i rrethuar
Nga njerëz që më vrasin
Përditë nga pak…
MURI
E shemba murin që na ndante shtëpitë,
I shqeva me dhëmbë telat me gjemba.
Po, si ta shemb, si,
Murin që ti mban përbrenda?…
LASGUSH PORADECIT
I ftohtë Pogradeci këtë ditë,
Mjergull mbuluar anembanë.
Imazhi i qytetit ngrin te sytë
E vajzës që kam pranë…
Fjala në buzë ngrin me drithmë,
Vala buzë gjolit llokoçit e zjen.
Nga Mali i Thatë dëgjoj një klithmë
Si krisje dallge përmbi liqen…
Më bëhet se vjen Lasgushi prej Edenit
Të gjejë Cucin ku i mbeti…
Përmbi stërkalat e liqenit
Dashurisë ia derdh vargjet poeti.
SHËN NAUM
Sa herë
Iki prej teje,
Një copë liqen
Marr me vete.
E mbaj
Në retinën
E syve të mi
Për t’u kthyer
Sërish
Një çast
Tek ti…
